ફરિયાદી ૩૦ વર્ષિય રામનિવાસ જગદીશપ્રસાદ શર્મા રાજસ્થાનના બિકાનેર જિલ્લાના ડુંગરગઢ તાલુકાના ગામમાં રહીને માર્કેટમાં અનાજની લે-વેચનો વેપાર કરે છે. દોઢ મહિના અગાઉ રામનિવાસને તેના પરિચિત બંસી સારસ્વતે જણાવેલું કે ઘનશ્યામ ઉપાધ્યાય નામનો તેનો એક મિત્ર (મૂળ રહે. ચુરુ, રાજસ્થાન હાલ રહે. રાજવીબાગ સોસાયટી, ગળપાદર) ગાંધીધામ રહે છે અને તેના મિત્રો સસ્તાં ભાવે સોનાની લે-વેચ કરે છે. રામનિવાસે ફોન પર ઘનશ્યામનો સંપર્ક કરેલો અને ઘનશ્યામે દીપક તથા વિશાલ નામના તેના બે મિત્રો સસ્તાં ભાવે સોનાની ડીલ કરતાં હોવાનું જણાવેલું.

ઘનશ્યામે ૨૪ કેરેટ ૧૦૦ ગ્રામ ગોલ્ડ બિસ્કિટનો રેટ ૧૧.૨૦ લાખ હોવાનું જણાવતાં સોનું ચેક કર્યાં બાદ ડીલ કરવાનું વિચારીને રામનિવાસ બિકાનેરમાં જ્વેલરી શૉ-રૂમ ચલાવતાં જાણકાર મિત્ર પવનકુમાર સ્વામીને લઈ ૧૨ ઑગસ્ટના રોજ ગાંધીધામ આવી શિવ રિજન્સી હોટેલમાં રોકાયેલો. બીજા દિવસે નંબર વગરની વર્ના કારમાં વિશાલ અને દીપકને લઈને ઘનશ્યામ હોટેલ બહાર આવેલો. કારમાં રામનિવાસ અને પવનને બેસાડીને ચા પીવા લઈ ગયેલાં. દીપક અને વિશાલે ‘હાલમાં શેઠ પાસે ગોલ્ડ નથી, બે ત્રણ દિવસ લાગશે’ તેમ જણાવતાં બેઉ જણ હોટેલમાં જ રોકાઈ ગયેલાં.

૧૪મીના રોજ ઘનશ્યામ ફરી વિશાલ અને દીપકને લઈ હોટેલ પર આવેલો. બેઉ જણને પોતે ઘરમાં એકલો જ રહેતો હોવાનું કહીને હોટેલનું ભાડું ભરવાના બદલે પોતાના ઘરે રોકાવાની ઘનશ્યામે ઑફર કરતાં બેઉ જણ હોટેલમાંથી ચેકઆઉટ કરી ઘનશ્યામ જોડે નીકળી ગયેલાં.

પવને ચેક કરતાં તે અસલી ગોલ્ડ બિસ્કિટ હતું. ત્યારબાદ આરોપીઓ ત્રણેને ઘનશ્યામના ઘેર મૂકી ગયેલાં. હોટેલ પર ગયાં તે સમયે પવને ચોરીછૂપે તેના મોબાઈલમાં દીપક અને વિશાલનો ફોટો પાડી લીધો હતો.

રામનિવાસ અને પવન બેઉ જણ માલ આવવાની રાહ જોતાં ઘનશ્યામના ઘરે રોકાઈ ગયેલાં. ગઈકાલે બપોરે એકથી દોઢના અરસામાં વિશાલ એક અજાણ્યા યુવક સાથે બ્લેક સ્વિફ્ટ કાર લઈને ઘનશ્યામના ઘેર આવેલો. તેણે એક પાર્ટી પાસે ૨૦૦ ગ્રામ ગોલ્ડ બિસ્કિટ હોવાનું કહીને ડીલ કરવા માટે પેમેન્ટની વ્યવસ્થા કરવા જણાવેલું. રામનિવાસે જોધપુર રહેતા તેના સાળાને કહીને તાત્કાલિક આંગડિયા મારફતે ૨૫ લાખ રોકડાં રૂપિયા મગાવેલાં અને ગાંધી માર્કેટમાં આવેલી કમલેશ કાન્તિ આંગડિયા પેઢીમાં જઈ લઈ આવેલો.

‘સોનું બીજી પાર્ટીનું છે અને જોવા માટે ત્યાં જવું પડશે’ કહીને વિશાલ સ્વિફ્ટ કારમાં પોતાની સાથે ઘનશ્યામ, રામનિવાસ અને પવનને બેસાડીને કંડલા ઝોન ગોલાઈ નજીક પુલિયા પાસે લઈ આવેલો. અહીં એક સફેદ ક્રેટા કાર આવેલી. વિશાલે ક્રેટામાં દીપક ગોલ્ડ લઈને આવ્યો હોવાનું જણાવેલું. દરમિયાન, ક્રેટામાંથી અજાણ્યો યુવક ઉતરીને તેમની કાર પાસે આવેલો. તેણે રૂપિયા બતાડવા માટે જણાલતાં રામનિવાસે ખોળામાં રહેલી બેગ ખોલીને રોકડાં રૂપિયા બતાવ્યાં બાદ તે યુવક પરત ક્રેટા કારમાં બેસી ગયેલો.

વિશાલે ઘનશ્યામ અને પવનને ક્રેટામાં જઈને ગોલ્ડ ચેક કરી લેવા જણાવતાં બેઉ જણ કારમાંથી બહાર નીકળી ક્રેટા તરફ આગળ વધેલાં. તેઓ માંડ પાંચથી છ ડગલાં આગળ વધ્યાં હતા ને અચાનક રામનિવાસ વિશાલ સાથે જે સ્વિફ્ટ કારમાં બેઠેલો તેના ડ્રાઈવરે કારને પૂરઝડપે દોડાવવાનું શરૂ કરી દીધેલું. પાછળ ક્રેટા આવતી હતી.

આરોપીઓ કંડલા તરફ રૂપિયા ભરેલી બેગ સાથે કાર હંકારી ગયાં હતા. વિશાલનો ફોન પર કોન્ટેક્ટ કરતાં ફોન બંધ થઈ ગયો હતો. બનાવ અંગે તેમણે ગાંધીધામ એ ડિવિઝન પોલીસ મથકે આવીને વાત કરતાં પોલીસે મોબાઈલમાં રહેલાં ફોટોના આધારે બેઉ જણની તપાસ હાથ ધરેલી.

વિવિધ ભારેખમ કલમો તળે ગુનો દાખલ કરીને પીઆઈ એમ.જે. રાઠોડ અને લોકલ ક્રાઈમ બ્રાન્ચે ચારે જણને ઝડપી લેવા તપાસ હાથ ધરી છે.