પશ્ચિમ કચ્છમાં તાજેતરમાં એસપી વિકાસ સુંડાએ રાજકીય આકાના ઈશારે આ જ પ્રકારે દસ લાખની ઠગાઈ કરનારી ચીટર ટોળકીને ખુલ્લેઆમ છાવરીને, કોઈ જ ફરિયાદ દાખલ કર્યા વગર આરામથી જવા દીધી છે ત્યારે પૂર્વ કચ્છ જિલ્લા પોલીસે કરેલી આ કડક કાર્યવાહી પબ્લિક માટે જ નહીં પશ્ચિમ કચ્છ પોલીસ માટે પણ સૂચક છે.

સુરતના હસન અન્સારીએ પોતાની સાથે પચાસ હજારની ઠગાઈ થઈ હોવાની પાંચમી જૂને ગાંધીધામ એ ડિવિઝન પોલીસ મથકે અંજારના અલી અસગર સુલેમાન શેખ અને અલ્તાફ ઈબ્રાહિમશા શેખ નામના ચીટરો સામે ફરિયાદ નોંધાવેલી. ગાંધીધામ એ ડિવિઝન પોલીસ ઈન્સ્પેક્ટર મોહનભાઈ ડી. ચૌધરીએ બનાવને ગંભીરતાથી લઈને ચોવીસ કલાકમાં જ બંને આરોપીની ૩૦ હજાર રોકડાં રૂપિયા, ગુનામાં વપરાયેલી મોટર સાયકલ અને ૩ મોબાઈલ ફોન મળી ૬૦ હજારના મુદ્દામાલ સાથે ધરપકડ કરી લીધી હતી.

પોલીસની ‘વિશિષ્ટ સરભરા’ દરમિયાન બેઉ જણે ગુનાની મોડસ ઓપરેન્ડી અને ગુનામાં વપરાયેલી નકલી નોટો અંજારના રીઢા ચીટર મામદશા જુસબશા શેખ (રહે. શેખ ટીંબો) પાસેથી મેળવી હોવાની કબૂલાત કરેલી. જેના પગલે ગાંધીધામ પોલીસે મામદશાની ધરપકડ કરી છે. મામદના કબજામાંથી પોલીસે પેપર કટિંગ મશિન, નકલી નોટોના બંડલો, તેને રંગવા માટેની પીંછી અને કલરના બે ડબ્બા વગેરે મળી ૬૪૬૦ રૂપિયાનો મુદ્દામાલ કબજે કર્યો છે.

હજુ પણ તેની ગેંગના અન્ય સાગરીતોની ધરપકડ થવાની શક્યતાઓ છે. પોલીસે આ મોડસ ઓપરેન્ડીથી ગુનાનો ભોગ બનેલાં લોકોને નિશ્ચિંતપણે ફરિયાદ નોંધાવવા આગળ આવવા અનુરોધ કર્યો છે.