કોવિડ સમયે શેરસિંહે દુકાન બંધ કરી નાખેલી. લાંબા સમય બાદ ગત વર્ષે ડિસેમ્બરમાં શેરસિંહ ફરિયાદીને મળેલો. પોતાની આર્થિક પરિસ્થિતિ ખરાબ હોવાનું અને જો ફરિયાદી સપોર્ટ કરે તો પોતે ફરી મોબાઈલ પાર્ટસ અને એક્સેસરીઝનો ધંધો શરૂ કરવા ઈચ્છતો હોવાનું જણાવેલું.

ફરિયાદીએ તેને પોતાની દુકાનનો પાછળનો ભાગ કે જેમાં મોબાઈલ એક્સેસરીઝ અને સ્પેર પાર્ટસનો સ્ટોક પડ્યો હતો ત્યાં જ દુકાન શરૂ કરવા જણાવેલું.

શેરસિંહે ૧૫-૧૨-૨૦૨૫ના રોજ ફરિયાદીને પાંચ લાખ રૂપિયા આપેલા અને બાકીના ૨૨.૪૦ લાખ રૂપિયા મે ૨૦૨૬ સુધીમાં ચૂક્તે કરી દેવાનો વાયદો કરીને એકતા સેલ્સ નામથી દુકાન શરૂ કરેલી. નાણાંની લેતી-દેતી અંગેનું ગત એપ્રિલ માસમાં વકીલ પાસે લખાણ પણ કર્યું હતું.

દુકાન શરૂ કર્યાં બાદ છેલ્લાં ત્રણ માસથી શેરસિંહે ભાડું ચૂકવતો નહોતો. ૧૯ એપ્રિલના રોજ પૈસાની વ્યવસ્થા કરવા માટે ગામડે જઉં છું તેમ કહીને નીકળી ગયેલો. ફરિયાદી તેને દુકાનના ભાડા અને લેવાના બાકી નીકળતાં ૨૨.૪૦ લાખ રૂપિયા માટે અવારનવાર ફોન કરતો હતો પરંતુ તે ફોન ઉપાડતો નહોતો. એકવાર તો ફોન ઉપાડીને હવે ફોન કર્યો તો જાનથી મારી નાખીશ તેવી ધમકી આપીને કટ કરી દીધેલો. તેનો મોબાઈલ પણ હવે બંધ થઈ ગયો છે. પોલીસે છેતરપિંડી અને વિશ્વાસઘાતની કલમો તળે ગુનો નોંધી તપાસ શરૂ કરી છે.