ચેમ્બરના પ્રમુખ તેજાભાઈ કાનગડે જણાવ્યું કે ઔદ્યોગિક વિકાસમાં મશિનરીની ભૂમિકા નિર્ણાયક છે. પરંતુ, દરેક ઉદ્યોગ માટે નવી મશિનરી ખરીદવી આર્થિક રીતે શક્ય નથી બનતું. ખાસ કરીને, MSME એકમો માટે મશિનરી પાછળનું પ્રારંભિક મૂડીરોકાણ, ધિરાણનો ખર્ચ, કાર્યકારી મૂડીની જરૂરિયાત અને બજારમાં સ્પર્ધાત્મક ભાવે ઉત્પાદન કરવાની ક્ષમતા મહત્વના પડકારો છે.

જો આવી મશિનરીની આયાત અને ઉપયોગને પ્રવર્તમાન કાયદા, ટેકનિકલ યોગ્યતા, સલામતી, પર્યાવરણીય ધોરણો તથા જરૂરી પ્રમાણપત્રોને આધીન રાખીને નીતિગત પ્રોત્સાહનો માટે પાત્ર ગણવામાં આવે તો ઉદ્યોગો માટે રોકાણના વધુ વિકલ્પો ખૂલશે. મર્યાદિત મૂડી ધરાવતા એકમોને પણ ઉત્પાદન ક્ષમતા વધારવા, ગુણવત્તામાં સુધારો કરવા, નવા બજારોમાં પ્રવેશવા અને રોજગારીની તકો ઊભી કરવા પ્રોત્સાહન મળી શકે છે.

ચેમ્બરના માનદ મંત્રી મહેશ તીર્થાણીએ ‘વિકસિત ગુજરાત ઔદ્યોગિક નીતિ ૨૦૨૫’ના લાભો નાના અને મધ્યમ ઉદ્યોગો સુધી વધુ અસરકારક રીતે પહોંચે તે દિશામાં વ્યવહારુ વિકલ્પોનો વિચાર કરવો જરૂરી હોવાનું જણાવતાં કહ્યું કે દરેક ઉદ્યોગ માટે નવી મશિનરી ખરીદવી શક્ય ના હોઈ જૂની મશિનરીના ઉપયોગને યોગ્ય પાત્રતા સાથે પ્રોત્સાહક લાભો માટે આવરી લેવાથી મૂડીરોકાણનો બોજ ઘટાડી શકાય છે. ઉદ્યોગોને પોતાની ક્ષમતા અનુસાર વિસ્તરણ કરવાની તક મળશે અને રાજ્યમાં ઉત્પાદન, રોજગારી તથા આર્થિક પ્રવૃત્તિઓને વધુ વેગ મળી શકશે.

કચ્છ જિલ્લો બંદરો, લોજિસ્ટીક્સ, પરિવહન, ઊર્જા, ખનિજ આધારીત ઉદ્યોગો, એન્જિનિયરીંગ, ઉત્પાદન અને ઔદ્યોગિક રોકાણની વિશાળ સંભાવનાઓ ધરાવતો પ્રદેશ છે. ત્યારે, સરકાર જો નીતિગત સુધારો કરી વિદેશથી આયાત થતી જૂની મશિનરીને પ્રોત્સાહન આપે તો એન્જિનિયરીંગ, મેટલ પ્રોસેસિંગ, ફેબ્રિકેશન, પ્લાસ્ટિક, પેકેજીંગ, ટેક્સટાઈલ, ફૂડ પ્રોસેસિંગ, મશિનરીના ભાગોનું ઉત્પાદન, મરામત અને જાળવણી જેવા ક્ષેત્રોમાં યોગ્ય મશિનરી ઉદ્યોગોની સ્પર્ધાત્મક્તા વધારવામાં ઉપયોગી બની શકે છે.