ગાંધીધામ નગરપાલિકાની ૨૦૧૫ની ચૂંટણીમાં વૉર્ડ નંબર ૧૧માંથી ચંદ્રિકાબેન દાફડાએ ઉમેદવારી ફોર્મ ભર્યું હતું. ઉમેદવારી ફોર્મમાં ચંદ્રિકાબેને મિલકતની સંપૂર્ણ વિગતો જાહેર ના કરી હોવાનું ધ્યાને આવતા ગાંધીધામના નાગરિક વેલજી નામોરી મહેશ્વરીએ ચૂંટણી અધિકારી સમક્ષ આરટીઆઈ કરીને વધુ વિગતો મેળવી હતી. ચંદ્રિકાબેને તેમના નામે ભચાઉના છાડવાડા ગામે આવેલી સર્વે નંબર ૪૮૨/૧/૧ જમીનની વિગતો ઉમેદવારી ફોર્મમાં ના દર્શાવી હોવા મુદ્દે વેલજી મહેશ્વરીએ વાંધો લઈને ચૂંટણી અધિકારી સમક્ષ કાર્યવાહી કરવા રજૂઆત કરેલી.

સમય મર્યાદા બાદ રજૂઆત આવી હોવાનું જણાવી ચૂંટણી અધિકારીએ પગલાં લેવાનો ઈન્કાર કરતાં વેલજીભાઈએ ગાંધીધામની લૉઅર કૉર્ટમાં ક્રિમિનલ ઈન્કવાયરી દાખલ કરેલી. કૉર્ટે ક્રિમિનલ કેસ રજિસ્ટર કરી કાર્યવાહી હાથ ધરતાં ચંદ્રિકાબેને આ કેસને રદ્દબાતલ ઠેરવવા ૨૦૧૮ના વર્ષમાં હાઈકૉર્ટમાં અરજી દાખલ કરેલી. હાઈકૉર્ટે તેના પર સ્ટે ફરમાવ્યો હતો.

હાઈકૉર્ટમાં કરેલી ક્વૉશિંગ પિટિશન સાથે ચંદ્રિકા દાફડાએ ભચાઉની તે જમીન લક્ષ્મીબેન વાછીયાભાઈ મહેશ્વરીને ૨૯-૦૨-૨૦૧૨ના રોજ વેચી હોવાના પચાસ રૂપિયાના સ્ટેમ્પ પેપર પર કરેલા નોટરાઈઝ્ડ સાટા કરારની નકલ જોડી હતી. ગાંધીધામના નોટરી સપના ડી. દાદલાણી પાસે નોટરી કરાવાઈ હતી, જેમાં કુલ ચાર લોકોની સહી હતી.

અરજદારે નોટરીના રજિસ્ટરની વિગત તપાસતાં જાણવા મળેલું કે સાટા કરારના નોટરી દસ્તાવેજમાં જે સિરિયલ નંબર દર્શાવાયો હતો તે જ સિરિયલ નંબરવાળું તે જ દિવસે અન્ય એક સોગંદનામું બન્યું હતું.

જેથી ચંદ્રિકાબેને જમીનના કેસમાંથી બચવા માટે સાટા કરારનો નકલી દસ્તાવેજ પાછળથી તૈયાર કરીને હાઈકૉર્ટ સમક્ષ રજૂ કર્યો હોવાનો ફરિયાદમાં જણાવાયું છે.

ફરિયાદમાં આરોપ કરાયો છે કે ૨૦-૦૬-૨૦૨૨ના રોજ છાડવાડાની એ જમીન રાજદીપસિંહ ઘનશ્યામસિંહ જાડેજા નામના શખ્સને વેચી મરાઈ હોવાનો ભચાઉ સબ રજિસ્ટ્રાર કચેરીમાં વેચાણ દસ્તાવેજ નોંધાયો હતો. આ દસ્તાવેજમાં ક્યાંય જણાવાયું નથી કે આ જમીન અગાઉ સાટા કરારથી લક્ષ્મીબેન મહેશ્વરીને વેચવામાં આવેલી અને તે સાટા કરાર પાછળથી રદ્દ કરાયાં છે.

૨૨-૦૮-૨૦૨૫ના રોજ હાઈકૉર્ટે ચંદ્રિકા દાફડાની પિટિશન ફગાવી દઈ, અગાઉ આપેલો સ્ટે દૂર કરી દેવાનો હુકમ કર્યાં બાદ વેલજીભાઈના ૬૫ વર્ષિય ભત્રીજા નાગશી હમીરભાઈ ચુણા (મહેશ્વરી)એ ફરિયાદ નોંધાવી છે. પીઆઈ એમ.ડી. ચૌધરીએ તપાસ હાથ ધરી છે.