ગત રાત્રે પેટ્રોલીંગ દરમિયાન LCBને બાતમી મળેલી કે પુના ભરવાડે તેના સાગરીત રામા ભરવાડ (પલાંસવા), યુનુસ ફકીરમામદ મીર (અંજાર), વાલજી ઊર્ફે વાલો ભીખા દેસાઈ (હલરા, ભચાઉ), મેરૂભા ઉદેસંગ વાઘેલા (રહે. અંતરજાળ, આદિપુર) અને અરજણ હિરા હેઠવાડિયા (રહે. ગોપાલનગર, ટપ્પર, અંજાર) સાથે પાર્ટનરશીપમાં ટેન્કરમાં ઈંગ્લિશ દારૂ બિયરનો જથ્થો મગાવ્યો છે અને હાલ ટપ્પર ડેમ પાસે અરજણની વાડીમાં તેનું કટિંગ ચાલી રહ્યું છે.

વાડીમાં ૧૨ વ્હિલવાળું અને ૫ ખાનાંવાળું GJ-12 BV-9881 નંબરનું ટેન્કર પડ્યું હતું. તેની પાસે ૧૦ વ્હિલવાળું GJ-12 AT_9880 નંબરનું આઈવા ડમ્પર, નંબર પ્લેટ વગરની બોલેરો કેમ્પર, એક મોટર સાયકલ અને એક ભંગાર હાલતમાં પડેલું પ્લેઝર દ્વિચક્રી પાર્ક હતા. વાહનો ઉપરાંત વાડીમાં બનાવાયેલી બે ઓરડીમાં પણ દારૂની પેટીઓ પડેલી હતી.

LCBએ વિવિધ બ્રાન્ડની વ્હિસ્કી અને બિયર મળી કુલ ૭૯.૫૨ લાખનો શરાબ તથા ૬ લાખના ટેન્કર, ૫ લાખના ડમ્પર, ૪ લાખની બોલેરો, ૫૦ હજારની મોટર સાયકલ વગેરે મળી કુલ ૧ કરોડ ૪ લાખ ૭૪૦૦નો મુદ્દામાલ કબજે કરી બાતમી મુજબના છ બૂટલેગરો સામે નામજોગ તથા વાહનોના ચાલકો, નાસી ગયેલાં મજૂરો સહિતના શખ્સો, માલ મોકલનાર વગેરે સામે દુધઈ પોલીસ મથકે પ્રોહિબિશનની વિવિધ ધારાઓ તળે ગુનો નોંધાવ્યો છે. ટેન્કરમાંથી એક રાજસ્થાની શખ્સનું આધાર કાર્ડ અને મોબાઈલ ફોન મળી આવ્યા છે. કામગીરીમાં પીઆઈ જે.એમ. વાળા, પીએસઆઈ ડી.જી. પટેલ સહિતનો સ્ટાફ જોડાયો હતો.

પુના ભરવાડ લાંબા સમયથી ભુજના ગણેશનગરમાં સ્થાયી થયો હતો. કેરાના લિસ્ટેડ બૂટલેગર અનોપસિંહ રાઠોડ સાથે પાર્ટનરશીપમાં તેણે અગાઉ કરોડોનો માલ મગાવ્યો હતો. કચ્છમાં દારૂનો જથ્થાબંધ માલ ઠાલવનારાં જે ગણ્યાંગાંઠ્યા બે પાંચ બૂટલેગરો છે તેમાં પુનો અને અનોપ મુખ્ય ગણાય છે.

ગળપાદરમાં જેલમાં બેઠાં બેઠાં પુનાએ મોબાઈલથી એક બાતમીદારને મારી નાખવાની ધમકી આપેલી અને તે મામલો પણ ભારે ચકચારી બન્યો હતો. છેલ્લે ફેબ્રુઆરી માસમાં ભુજના વડવાળા ગામે એસએમસીએ ચાર કરોડનો વિક્રમી દારૂનો જથ્થો ઝડપ્યો ત્યારબાદ પૂર્વ અને પશ્ચિમ કચ્છમાં ‘મોટી ગાડીઓ’ને મંજૂરી આપવાનું બંધ કરી દેવાયેલું.