બાતમીના આધારે LCBએ ગત સાંજે સામખિયાળીથી પસાર થઈ રહેલા GJ-06 AZ-9223 નંબરના ટેન્કરને અટકાવી તલાશી લેતાં તેમાંથી આ જંગી દારૂ મળી આવ્યો હતો.

પોલીસે ઑલ સીઝન, રોયલ ચેલેન્જ, રોયલ સ્ટેગ અને મૅકડોવેલ્સ નંબર વન બ્રાન્ડની ૭૫૦ એમએલની ૩૫૨૮ બોટલ અને ૧૮૦ એમએલની ૧૧૨૮૦ બોટલ મળી કુલ ૭૮.૨૫ લાખના શરાબની બાટલીઓ જપ્ત કરી હતી. શરાબનો જથ્થો પંજાબના મોહાલીની ડિસ્ટલરીનો છે.

પોલીસે ઝડપેલાં ડ્રાઈવર જગદીશ ડારા (બિશ્નોઈ) (રહે. ઝાલોર, રાજસ્થાન)એ પ્રાથમિક પૂછપરછમાં કબૂલ્યું કે સંજયસિંહ વિજેન્દરસિંહ (સીકર, રાજસ્થાન) અને ધીરસિંહ સુભાષ રેવાડ (રહે. ઝુંઝનુ, રાજસ્થાન)એ ટેન્કરમાં દારૂ ભરાવ્યો હતો.

ડ્રાઈવરના કબજામાંથી મળી આવેલાં ૧૦-૧૦ હજારના બે મોબાઈલ ફોન, ૫૫૦૦ રુપિયા રોકડાં અને ૩૦ લાખનું ટેન્કર વગેરે મળી પોલીસે કુલ ૧ કરોડ ૮ લાખ ૫૦ હજારનો મુદ્દામાલ કબજે કરી તમામ આરોપીઓ સામે સામખિયાળી પોલીસ મથકે પ્રોહિબિશનની વિવિધ ધારાઓ તળે ગુનો દાખલ કરાવ્યો છે. સફળ કામગીરીમાં પીઆઈ એન.એન. ચુડાસમા, પીએસઆઈ ડી.જી. પટેલ અને ક્રાઈમ બ્રાન્ચનો સ્ટાફ જોડાયો હતો.