શુક્રવારે અષાઢી બીજના દિવસે અનિલના ડીએનએ મેચ થઈ જતાં આજે પરિવારને તેનો મૃતદેહ સુપ્રત કરી દેવાયો હતો. આજે સમી સાંજે શબવાહિનીમાં અનિલનો મૃતદેહ દહીંસરા લવાયો ત્યારે ગામ અને સમાજના લોકોની મોટી સંખ્યામાં  ઉમટી પડ્યાં હતા. સૌની હાજરીમાં તેની અંત્યેષ્ઠી કરવામાં આવી હતી.

અમદાવાદસ્થિત ડીએનએ તજજ્ઞે જણાવ્યું કે અનિલનો મૃતદેહ અત્યંત ખરાબ રીતે બળી ગયો હોઈ મૃતદેહમાંથી ડીએનએ મેળવવામાં ભારે જહેમત પડી હતી.

ડીએનએ મેચ ના થતાં પરિવારજનોમાં અંતરના ઊંડાણથી ક્યારેક આશાનું આછું  કિરણ પણ ચમકતું હતું કે કદાચ તે જીવિત બચી ગયો તો નહીં હોય ને..

મૃતક અનિલ ત્રણ ભાઈઓમાં વચલો હતો. અગાઉ તે સેશલ્સમાં કામ કરી આવ્યો હતો. એક દૂરના સંબંધીએ તેને છ માસ માટે લંડન બોલાવતાં તે પહેલીવાર લંડન જતો હતો. એર ઈન્ડિયાની એ કમનસીબ ફ્લાઈટમાં ૨૧-G નંબરની સીટ પર તે બેઠો હતો. અનિલ ટાઈલ્સનો અચ્છો કારીગર હતો.