શનિવારે બપોરે ગાંધીધામના વોર્ડ ૭-ડીમાં રહેતા દિનેશ ભાણજીભાઈ પટેલના ઘેર અજાણ્યો બાવો ગયો હતો. ફરિયાદીના પત્ની ગીતાબેને થોડાંક માસ અગાઉ પડી જવાથી કમરે બેલ્ટ પહેરેલો, તે જોઈ બાવાએ તેમને શરીરમાંથી નડતર દૂર કરી આપવાની વિધિ કરી આપવાનું કહેલું.

અજાણ્યા બાવાએ પાણી ભરેલો ગ્લાસ મગાવી, મંત્ર ફૂંકીને તે પાણી ગીતાબેન પર છાંટીને ‘તમારા ઘરમાં ખોટાં સમયે સોનાના દાગીના આવી ગયાં છે અને તેનું શુધ્ધિકરણ કરવું પડશે’ કહીને ઘરમાં પડેલાં ઘરેણાં માટલાંમાં લઈ આવવા જણાવેલું. બાવાની વાતોથી ભોળવાઈને અથવા વશીકરણથી હોશ ગૂમાવી ચૂકેલાં ગીતાબેને તમામ દર-દાગીના માટલાંમાં ભરીને બાવાને આપ્યાં હતા.

બનાવ અંગે ગાંધીધામ એ ડિવિઝન પોલીસ સ્ટેશને ફરિયાદ નોંધાતાં રેન્જ આઈજી ચિરાગ કોરડીયા અને એસપી સાગર બાગમારે તેને ગંભીરતાથી લીધી હતી.

આરોપીઓની બોલવા ચાલવાની રીત, પહેરેલાં કપડાં, આવવા જવાના રૂટ પરથી એલસીબીની ટીમે આરોપીઓનું પગેરું  દબાવીને તેમને અંજારના મિંદીયાળા ગામની સીમમાંથી ઝડપી પાડ્યાં છે.

ઝડપાયેલાં આરોપીઓમાં બાવો બનનાર તૂફાનનાથ ઊર્ફે શેતાનનાથ મીરકાનાથ વાદી, તેનો ગુરુ બનનાર જુલાનાથ રુમાલનાથ વાદી અને ગુનામાં મદદગારી કરનાર દેવનાથ પોપટનાથ વાદી (રહે. ત્રણે મૂળ વાદીનગર, ભચાઉ)નો સમાવેશ થાય છે. ફરિયાદમાં ૧૪.૪૦ લાખના દાગીનાની ઠગાઈ થઈ હોવાનું લખાવાયું હતું પરંતુ પોલીસે આરોપીઓના કબજામાંથી કુલ ૨૧.૪૬ લાખના દાગીના રીકવર કર્યાં છે. તદુપરાંત, ગુનામાં વપરાયેલાં ત્રણ મોબાઈલ ફોન, એક નંબર પ્લેટ વગરની મોટર સાયકલ, સાધુના ઉપયોગમાં લેવાતું કમંડલ, માળાઓ, ગમછો વગેરે કબજે કર્યાં છે.

ગુનાના ડિટેક્શનમાં પીઆઈ એન.એન. ચુડાસમા, પીએસઆઈ ડી.જી. પટેલ અને અન્ય સ્ટાફ જોડાયો હતો.