ત્યારબાદ ભચાઉમાં પીઆઈ તરીકે કામ કરેલું અને હાલ તે લોકલ ઈન્ટેલિજન્સ બ્રાન્ચમાં ફરજરત હતા.

જાડેજા ભચાઉમાં પોલીસ ઈન્સ્પેક્ટર તરીકે ફરજ બજાવતા હતા તે સમયગાળા દરમિયાન ડીજીના સીધા મોનિટરીંગ હેઠળ કાર્યરત સ્ટેટ મોનિટરીંગ સેલની ટીમે વિદેશી દારૂના બે ક્વૉલિટી કેસ કર્યા હતા.

૪ નવેમ્બર ૨૦૨૫ના રોજ SMCએ ભચાઉની અણુશક્તિ કંપની નજીક આવેલી બજરંગ આઈ હોટેલના પાર્કિંગમાં દરોડો પાડી સિમેન્ટ બલ્કર ટેન્કરમાંથી ૧.૮૬ કરોડ રૂપિયાનો વિદેશી શરાબનો જંગી જથ્થો જપ્ત કરેલો. શરાબનો જથ્થો રાજસ્થાનના રીઢા બૂટલેગર અનિલ પાંડિયાએ સપ્લાય કર્યો હોવાનું પકડાયેલાં ટેન્કર ડ્રાઈવરની પૂછપરછમાં ખૂલેલું. એટલું જ નહીં, આ અગાઉ પણ તેણે કચ્છમાં એક ખેપ મારી હોવાનું કબૂલેલું.

એ જ રીતે, અઢી માસ અગાઉ ૨૩ ફેબ્રુઆરી ૨૦૨૬ના રોજ SMCએ ભચાઉના વોંધની સીમમાં કટિંગ ટાણે દરોડો પાડીને નકલી નંબર પ્લેટ અને સીસીટીવી લગાડેલી કન્ટેઈનર ટ્રકમાંથી એક કરોડનો ઈંગ્લિશ દારૂ ઝડપેલો. શરાબનો આ જથ્થો ભચાઉના લિસ્ટેડ બૂટલેગર અશોકસિંહ ઊર્ફે મામા બાલુભા જાડેજા, અર્જુનસિંહ અશોકસિંહ જાડેજા, અશોકના ભત્રીજા ભગીરથસિંહ દુર્ગાસિંહ જાડેજા અને શિવમસિંહ જાડેજાએ મગાવ્યો હોવાનું ખૂલતાં તેમની વિરુધ્ધ ભચાઉ પોલીસ મથકે ફરિયાદ નોંધાવાઈ હતી.

આ બે દરોડાની ઉચ્ચસ્તરેથી ચાલી રહેલી આંતરિક તપાસના અંતે અઢી મહિના બાદ જાડેજાને સસ્પેન્ડ કરવા હુકમ થયો છે. આ તપાસમાં જાડેજાની બૂટલેગરો સાથેની કોઈ સાંઠગાંઠ બહાર આવી છે કે કેમ તે વિશે સત્તાવાર રીતે કશો ફોડ પડાયો નથી. પરંતુ, જરૂર કોઈ ગંભીર બાબત બહાર આવી છે જેથી આ કડક પગલું લેવાયું છે તેમ પોલીસ બેડામાં ચર્ચાઈ રહ્યું છે.

થોડાંક સમય બાદ એ.એ. જાડેજાની લીવ રીઝર્વમાંથી એલઆઈબીમાં બદલી કરાઈ હતી.

પૂર્વ કચ્છના પોલીસ ખાતાંનો ઈતિહાસ રહ્યો છે કે જ્યારે જ્યારે બૂટલેગર ‘મામા’નો માલ પકડાયો છે ત્યારે ત્યારે ભચાઉના પીઆઈ, પીએસઆઈઓને સસ્પેન્સન ભોગવવાનો વારો આવ્યો છે. જાડેજાના સસ્પેન્સન સાથે વધુ એકવાર આ ઇતિહાસ દોહરાયો છે. વક્રતા એ છે કે માલ મગાવનાર આરોપી મામા એન્ડ કંપની આ કેસમાં જામીન પર છૂટીને ફરી એક્ટિવ થઈ ગઈ છે!