મંદિરે આવતા દર્શનાર્થી, બહેનપણીઓ મારફતે આ દીકરી ઈસ્કોન મંદિરના વોટસએપ પર ચાલતાં સત્સંગ ગૃપમાં જોઈન થયેલી. આ ગૃપનો એડમિન શુભ્રાંસુ દાસગુપ્તા નામનો પશ્ચિમ બંગાળનો યુવક છે અને ગૃપમાં શુભમ્ પરેઢા, શિલ્પા શેઠ, ખુશી દેવાંગન, ખુશી છેત્રી નામના અન્ય યુવક યુવતીઓ પણ જોડાયેલાં છે. પાછળથી ઓનલાઈન ગૃપ ટેલિગ્રામ એપ પર એક્ટિવ કરાયેલું. દરરોજ મોડી રાત્રે શુભ્રાંસુ દાસગુપ્તા ગૃપમાં સત્સંગ સહિતના વિવિધ અવનવા વિષયો પર ઓનલાઈન ચેટીંગ કરીને ક્લાસીસ લેતો.  

પિતાએ દીકરીને આવા સત્સંગ ગૃપમાં રહેવા માટે ના પાડેલી.

થોડાંક સમય પછી એક દિવસ દીકરીએ અચાનક પિતા પાસે આવીને જણાવેલું કે પપ્પા આપણે વૃંદાવન આશ્રમમાં સેવા કરવાના હેતુથી ૫૧ હજાર રૂપિયા આપવાના છે તેવું મને ગૃપ એડમિન શુભ્રાંસુ દાસગુપ્તાએ જણાવ્યું છે. પિતાએ નાણાં આપવાનો સ્પષ્ટ ઈન્કાર કરી દેતા દીકરી દુઃખી થઈને ખૂબ જ રડી હતી. અંતે, દીકરીની લાગણી ખાતર પિતાએ તેમના મોબાઈલ પરથી શુભ્રાંસુએ આપેલા શિલ્પા શેઠના પંજાબ નેશનલ બેન્કના ખાતામાં ૫૧ હજાર રુપિયા ઓનલાઈન પે કરી દીધા હતા.

તેમ છતાં શુભ્રાંસુ ગમે તે રીતે દીકરી સાથે ચેટ કરીને ઓનલાઈન ક્લાસીસ લેતો હતો.

પોલીસ સૂત્રોએ જણાવ્યું કે આ ઘટના બાદ શુભ્રાંસુ દ્વારા ફરી નાણાંની માંગણી શરૂ થયેલી. ગભરાયેલી દીકરીને પિતાએ ભરોસો આપીને પૂછપરછ કરતાં દીકરીએ ચોધાર આંસુએ રડતાં જણાવેલું કે ‘પપ્પા આ શુભ્રાંસુ મને કહે છે કે હવે તારે ગૃપમાંથી લેફ્ટ થવાનું નથી. જો તું ગૃપમાં નહીં રહે તો હું તને અને તારા પરિવારને જાનથી મારી નાખીશ. મારી નાખવાની ધમકી આપીને જ તેણે સેવાના નામે ૫૧ હજાર રૂપિયા પડાવ્યાં હતા. તે મને પરિવારથી અલગ થઈને તેમની સાથે આવી જવાનું સતત દબાણ કરી ડરાવ્યાં ધમકાવ્યાં કરે છે’

પીઆઈ એમ.ડી. ચૌધરીએ જણાવ્યું કે શુભ્રાંસુ પશ્ચિમ બંગાળનો યુવક છે અને ગૃપમાં સામેલ મોટાભાગના મેમ્બર્સ અન્ય રાજ્યોના યુવક યુવતીઓ છે. આરોપીઓ ખરેખર ઈસ્કોન સાથે સંકળાયેલાં છે કે તે હજુ નિશ્ચિત થયું નથી.