જૂન માસમાં ફરિયાદીને ટેલિગ્રામ પર દિપા નામની યુવતીનો સંદેશ મળેલો. જેમાં ઘેરબેઠાં વધારાની કમાણી કરવાની ઈચ્છા હોય તો અમારી સાથે જોડાવ તેવા સંદેશ સાથે CONFORGE FINANCE નામની કંપનીના ગૃપની લિન્ક હતી. ફરિયાદી ગૃપમાં જોઈન થયાં બાદ તેમને કંપની જે લિન્ક મોકલે તે ઓપન કરી તેને ફૉલો કરી તે સ્ક્રીન શોટ ગૃપ એડમિનને મોકલવા અને તેવા પ્રત્યેક ટાસ્કદીઠ પોઈન્ટ મળશે જેનું રોકડમાં રુપાંતર થશે તેમ જણાવાયું હતું.

થોડાંક સમય બાદ દિપા નામની યુવતીએ ફરિયાદીને તમે સારું કામ કરો છો અને કમાવ છો તો તે નાણાં ક્રિપ્ટો કરન્સીના શૅરમાં ઈન્વેસ્ટ કરી ૨૦થી ૩૦ ટકાનો નફો બૂક કરવા સૂચન કરાયું હતું. ફરિયાદીએ દિપાની સલાહ મુજબ પોતાની યુઝર આઈડી ક્રીએટ કરીને રોકાણ કરવાનું શરૂ કરેલું.

કોઈને શંકા ના જાય તે માટે કંપની રોકાણની રકમ સાથે ભારત સરકારના લોગોવાળું ગેરન્ટી એગ્રીમેન્ટ આપતી હતી. કંપનીના એકાઉન્ટમાં રોકાણ સામે ઓનલાઈન પ્રોફિટ દેખાતો હતો. ફરિયાદીએ એક હજારથી રોકાણની શરૂઆત કરેલી. ઘણીવાર રુપિયા વિડ્રૉ પણ કરેલાં. ધીમે ધીમે ૨૬ લાખ રૂપિયા જેટલું રોકાણ કરેલું. ત્યારબાદ નાણાં ઉપાડ બંધ થઈ ગયેલો. સાયબર માફિયાઓએ તમે કંપનીના નિયમોમાં ભંગ કર્યો છે અને પેનલ્ટી ભરશો તો ખાતું ફરી ખુલશે અને રૂપિયા ઉપાડી શકશો તેમ કહેલું.

દરમિયાન, આરોપીઓએ ફરિયાદીને કોઈનબેઝ નામની બીજી એક કંપનીમાં ઓનલાઈન એકાઉન્ટ ખોલી ઈન્વેસ્ટ કરવા અને જૂના ખાતાના રુપિયા પણ ધીમે ધીમે વિડ્રો થઈ શકશે તેમ કહીને તેમાં રોકાણ કરવાની જાળમાં ફસાવ્યો હતો.  ફરિયાદીએ  બીજી કંપનીમાં ઈન્વેસ્ટ કરેલું અને તેમાં પણ ખાતું બંધ થઈ ગયેલું. ફરી ટેક્સ અને પેનલ્ટીના નામે તેની પાસે ૩૦.૩૭ લાખ રુપિયા ભરાવાયાં હતા. આ રીતે, સાયબર ફ્રોડસ્ટરોએ ૫૬.૪૭ લાખ રૂપિયા હજમ કરી ગયા હતા. પોલીસે ગુનો નોંધી તપાસ શરૂ કરી છે.