આદિપુરની એક હોસ્પિટલમાં ફાર્માસિસ્ટ તરીકે નોકરી કરતી ૨૦ વર્ષની ફરિયાદી યુવતી તેના બૉય ફ્રેન્ડ જોડે રવિવારે સાંજે રમાડા હોટેલ સામે આવેલા તળાવ કાંઠે ફરવા ગયેલી. બંને તળાવની પાળે બેસીને વાતો કરતા હતા ત્યારે અચાનક કાળાં કપડાં પહેરેલાં ૨૫થી ૩૦ વર્ષની વયના ત્રણ યુવકો હોન્ડા મોટર સાયકલ પર ધસી આવ્યાં હતાં.

ફરિયાદી યુવતી અને તેના મિત્રએ ત્રિપુટીને કોઈ મચક આપી નહોતી અને પોલીસ સ્ટેશને લઈ જવાનું કહેતા તેમણે પોલીસ સ્ટેશને આવવાની તૈયારી દર્શાવી હતી.

આટલેથી સંતોષ ના થતાં તેમણે ફરિયાદી યુવતીનું પર્સ ચેક કરેલું પરંતુ તેમાં રૂપિયા નહોતા. જેથી તેમણે ઓનલાઈન એક હજાર રૂપિયા આપવા જણાવી મોબાઈલ સ્કેનર મારફતે રકમ ટ્રાન્સફર કરવા કહેલું. ગભરાઈ ગયેલી યુવતીએ તેના ફોનથી આરોપીના ખાતામાં ઓનલાઈન એક હજાર રૂપિયા ટ્રાન્સફર કરી દીધા હતા.

બાદમાં ત્રિપુટી બાઈક પર ત્યાંથી જતી રહી હતી.

યુવતી ઘરે આવી તો સલીમ રાજાના જીપે અકાઉન્ટથી યુવતીને એક-એક હજાર રૂપિયા ટ્રાન્સફર કરી દેવાની બે વખત રિક્વેસ્ટ આવેલી. એટલું જ નહીં, અનીસ મલિક નામના અન્ય એક જી-પે એકાઉન્ટથી પણ નાણાં ટ્રાન્સફર કરી આપવા રિક્વેસ્ટ આવેલી પરંતુ યુવતીએ નાણાં જમા કરાવ્યા નહોતાં.

બનાવ બાદ ગભરાઈ ગયેલી યુવતીએ ગત રાત્રે પોલીસ સ્ટેશને આવી ફરિયાદ લખાવતાં આદિપુર પોલીસ તુરંત હરકતમાં આવી ગઈ હતી. પોલીસે ટેકનિકલ સર્વેલન્સના આધારે ત્રણ યુવકોને દબોચી લઈને ગહન પૂછપરછ શરૂ કરી છે.