બાતમીના આધારે ગત મોડી રાત્રે SOGએ ગળપાદરથી ભચાઉ તરફ જતા હાઈવે પર મીનાક્ષી હેન્ડલિંગના વાડા પાસે છૂટક ડ્રગ્ઝ વેચાણ કરવા ઊભેલાં અન્જુમ અકીલ એહમદ સિદ્દીકીને ઝડપી પાડ્યો હતો.

ગુલાબ બ્રાન્ડની માચિસના નાનકડાં બાકસમાં હેરોઈનના આછાં ક્રીમ કલરના ગાંગડાં મળી આવ્યાં હતા. હેરોઈનનો જથ્થો કોની પાસેથી મેળવેલો તે અંગે પ્રાથમિક પૂછપરછમાં કશી નક્કર માહિતી મળી શકી નથી. અન્જુમ સામે ગાંધીધામ એ ડિવિઝન પોલીસ મથકે એનડીપીએસની વિવિધ ધારાઓ તળે ગુનો દાખલ કરાવાયો છે.

ડ્રગ્ઝના સેવન માટે ગુજરાતમાં ઠેર ઠેર ગોગો પેપર અને કોનનું વેચાણ થતું હોવાનું જાણીને ચોંકી ઉઠેલી ગુજરાત સરકારે તેના વેચાણ, સંગ્રહ પર પ્રતિબંધ ફરમાવી દીધો છે. સરકારના જાહેરનામાના પગલે સમગ્ર કચ્છમાં પોલીસે ઠેર ઠેર ઝુંબેશ છેડીને ગોગો પેપરનું વેચાણ કરતાં દુકાનદારો સામે કાર્યવાહી કરી માલ જપ્ત કર્યો છે. જો કે, તેમ છતાં છાનેછપને તેનું વેચાણ ચાલી રહ્યું છે. ગાંધીધામના કલેક્ટર રોડ પર દિશા જનરલ સ્ટોર્સ નામની દુકાનમાં દરોડો પાડીને ગાંધીધામ એ ડિવિઝન પોલીસે ગોગો પેપર, પ્રી-રોલ્ડ કોન, ફિલ્ટર પેપર, રોલીંગ પેપર વગેરે મળી ૫૯૦ રૂપિયાની કિંમતના પ્રતિબંધિત પેપર અને કોન જપ્ત કર્યાં છે. દુકાનદાર તેજભાન મહાદેવ લાલવાની સામે જાહેરનામા ભંગ હેઠળ કાર્યવાહી હાથ ધરાઈ છે.