૨૦૧૮માં ગાંધીધામ કૉર્ટે સગી જનેતા અને બહેનની હત્યા કરવાના ગુનામાં ૧૯ વર્ષની મંજુ સથવારા નામની યુવતીને ફાંસીની સજા ફટકારેલી. તો, છેલ્લે ૨૦૧૯માં અંજાર સેશન્સ કૉર્ટે બાળકીના અપહરણ, રેપ વીથ મર્ડરના કેસમાં રાપરના ગુંડાને ફાંસીની સજા ફટકારેલી.

સેશન્સ કૉર્ટે આપેલો આ ચુકાદો રેફરન્સ માટે હાઈકૉર્ટમાં મોકલાશે. હાઈકૉર્ટની પુષ્ટિ બાદ ફાંસીની સજા કાયમ રહેશે.

જો હાઈકૉર્ટ સેશન્સનો ચુકાદો બહાલ રાખે તો તેની પાસે સુપ્રીમ કૉર્ટમાં અપીલના દ્વાર ખુલ્લાં રહે છે. સુપ્રીમ પણ ફાંસીની સજા કાયમ રાખે તો છેલ્લી આશા રાષ્ટ્રપતિ પાસે દયાની અરજીની રહે છે.

ભચાઉના મનફરા ગામે વેવાઈ પક્ષના એકસાથે પાંચ સંબંધીઓની હત્યા કરનારા ઈલિયાસ ગગુ ઘાંચીને ભુજ સેશન્સ કૉર્ટે ફાંસીની સજા ફટકારી હતી. જો કે, પાછળથી ભુજના દિવંગત વરિષ્ઠ એડવોકેટ એમ.બી. સરદારે હાઈકૉર્ટમાં અપીલ કરીને કેસમાં રહેલા વિવિધ વિરોધાભાસી મુદ્દાઓને ટાંકીને ઈલિયાસ ઘાંચીને નિર્દોષ છોડાવ્યો હતો તેમ એડવોકેટ સરદાર પાસે વકીલાતના પાઠ શીખેલાં વર્તમાન સિનિયર એડવોકેટ આર.એસ. ગઢવીએ ઉમેર્યું છે.

૧૯૯૯માં લખપતના સુરો ગાંડારો ડુંગર પરથી પોલીસે ૨૪ કિલોગ્રામ આરડીએક્સ, ડિટોનેટર, રીમોટ કંટ્રોલ સ્વિચ, ૬૦થી ૬૫ જેટલી પિસ્ટલ, ૨૦ રિવોલ્વર, ઢગલાબંધ જીવંત કારતૂસો સહિતના મોતના સામાન સાથે પાકિસ્તાની જાસૂસી સંસ્થા ISIના ચાર એજન્ટો ઝડપાયાં હતા.

આરોપીઓએ હાઈકૉર્ટમાં અપીલ કરતાં હાઈકૉર્ટે ચારેયની ફાંસીની સજાને આજીવન કેદમાં પરિવર્તિત કરી હતી. આ કેસમાં તત્કાલિન એસપી એ.કે. સિંઘ અને એલસીબી પીએસઆઈ ડી.આર. અગ્રાવતે ઘણી મહેનત કરેલી. ફરિયાદ પક્ષ વતી સ્પેશિયલ પબ્લિક પ્રોસિક્યુટર તરીકે રત્નાકરભાઈ ધોળકીયા અને પૂર્વ ડીજીપી કે.સી. ગોસ્વામીએ સફળ પેરવી કરેલી.

૨૦૦૧ના ગોઝારા ભૂંકપના છએક માસ બાદ પોલીસે ખાવડા નજીક કાળા ડુંગર પાસેથી ૧૪ કિલોગ્રામ RDX, VHF Sets, બોમ્બ ટાઈમર, પિસ્તોલ વગેરે પીઠ પર લાદેલી હાલતમાં લવાયેલાં પાકિસ્તાની ઊંટ સાથે મુઝમ્બિલ શાહનવાઝ હુસેન ભટ્ટી નામના લશ્કર-એ-તૈયબાના આતંકીની ધરપકડ કરેલી.

પાછળથી હાઈકૉર્ટે ફાંસીની સજાને આજીવન કેદમાં પરિવર્તિત કરી હતી. આ કેસમાં ફરિયાદ પક્ષ વતી સ્પેશિયલ પબ્લિક પ્રોસિક્યુટર તરીકે રત્નાકર ધોળકીયા અને તેમના જૂનિયર એડવોકેટ કે.સી. ગોસ્વામીએ પેરવી કરેલી.

ગાંધીધામની નવી સુંદરપુરીમાં ઘરકામ બાબતે માતાએ આપેલા ઠપકાથી ઉશ્કેરાઈને ૧૯ વર્ષિય મંજુ કસ્તુરભાઈ ડુંગરીયા (દેવીપૂજક)એ ૧૭-૦૨-૨૦૧૭ની પરોઢે પાંચ વાગ્યે સગી માતા અને બહેનને તલવાર મારી હત્યા કરી હતી. આ ગુનામાં ૧૫-૦૩-૨૦૧૮ના રોજ ગાંધીધામના અધિક સેશન્સ જજ ડી.આર. ભટ્ટે મંજુને ફાંસીની સજા ફટકારી હતી.

મંજુ સ્કિઝોફ્રેનિયા નામના માનસિક રોગથી પીડાતી હોવાની બાબતને ટ્રાયલ કૉર્ટે નજરઅંદાજ કરી હોવાનું હાઈકૉર્ટે ઠેરવ્યું હતું.

૧૫-૦૬-૨૦૧૨ના રોજ રાપર તાલુકાના સઈ ગામની સીમની વાડીએ અન્ય બાળકો સાથે રમતી ૬ વર્ષની ફૂલ જેવી બાળકીનું અપહરણ કરીને ક્રૂરતાપૂર્વક બળાત્કાર આચરી તેની હત્યા કરનારાં પીછાણા ગામના દેવા ધના કોલી નામના નરાધમને ૧૬-૦૨-૨૦૧૯ના રોજ અંજારના અધિક સેશન્સ જજ એસ.ડી. પાંડેએ ફાંસીની સજા ફટકારી હતી. સરકારી વકીલ ડી.બી. જોગીએ દલીલો કરેલી.

ફાંસીની સજા સામે આરોપીએ હાઈકૉર્ટમાં અપીલ કરેલી. હાઈકૉર્ટે ફાંસીની સજા રદ્દ કરી તેને ૩૦ વર્ષની કેદની સજા ફટકારેલી.