અપહરણ સમયે કેતનભાઈએ ગાડીમાં બેસવા ભારે પ્રતિકાર કરીને રાડારાડ કરી મૂકતાં આસપાસના લોકોને જાણ થઈ ગઈ હતી.

પહેલાંથી જ એલર્ટ પોલીસે આ ગાડીનો પીછો શરૂ કરેલો. આ વિસ્તારથી અજાણ અપહરણકારો ફાંફે ચઢેલાં અને ગાડી ગામના સીમાડે પાણીના વોકળા બાજુ જઈને ભરાઈ ગયાં હતા. ગાડીમાં પણ નુકસાન થયું હતું.

બપોરે બેને નવ મિનિટના અરસામાં અપહરણ થયેલું અને બનાવની જાણ થતાં સ્થાનિક આગેવાન ધવલ આચાર્યે તુરંત ૨.૧૭ મિનિટે એસપી સાગર બાગમાર અને એ ડિવિઝન પીઆઈ એમ.ડી. ચૌધરીને જાણ કરી હતી. જેના પગલે પોલીસે તુરંત ભચાઉ અને સામખિયાળી પોલીસને રસ્તા પર નાકાબંધી કરવા સૂચના આપી હતી.

અપહરણનો ભોગ બનેલાં કેતનભાઈ સહીસલામત છે. તે પરત ગાંધીધામ આવી ગયાં છે. કેતનભાઈએ નિકટના લોકોએ જણાવ્યું કે અપહરણકારોએ તેમની જોડે ગાડીમાં કોઈ મારકૂટ કરી નહોતી. તેમણે અપહરણકારોને પૈસા જોઈતાં હોય તો પોતાનો ફોન પરત આપવા અને પોતે ફોનથી વ્યવસ્થા કરી દેશે તેમ જણાવેલું પરંતુ અપહરણકારોએ તેમને જણાવેલું કે અમારે તમને સામખિયાળી ખાતે બીજા લોકોને સુપ્રત કરવાના છે. અપહરણકારો હિન્દીભાષી હતા.

અપહરણમાં વપરાયેલી કારની નંબર પ્લેટ ખોટી છે. અપહરણ પાછળનો હેતુ ખંડણી માગવાનો જ છે કે કેમ તે હજુ સ્પષ્ટ થયું નથી. હાલ ફરિયાદ નોંધવા તજવીજ ચાલી રહી છે. અપહરણનો પ્લાન કોણે બનાવેલો, આરોપીઓ અપહરણ પૂર્વે ક્યાં રોકાયેલાં, ગુનાને અંજામ આપતાં અગાઉ કોઈ રેકી કરેલી કે કેમ, ગાડી કોની છે, કેતનભાઈ પાસે રહેલી માલમતા લૂંટી છે કે કેમ વગેરે વિવિધ મુદ્દે પોલીસની ગહન તપાસ ચાલું છે.