ડૉ. સત્યમે જણાવ્યું કે તેઓ વડીલોપાર્જીત ખેતીની જમીનો ધરાવે છે અને પોતે ખેડૂત ખાતેદાર છે. ૨૦૨૪માં તેમની પ્રતિષ્ઠાને હાનિ પહોંચાડવાના ઈરાદે તેમની સામે મુંબઈ ગણોત વહીવટ અધિનિયમ હેઠળ ભુજ શહેર મામલતદાર અને એગ્રિકલ્ચર લેન્ડ ટ્રિબ્યુનલમાં ફરિયાદ કરાયેલી. આ મામલે સુનાવણી હાથ ધરાયેલી અને ૦૯-૦૪-૨૦૨૫ના રોજ મામલતદારે તેમની તરફેણમાં ચુકાદો આપ્યો હતો.

આ ફરિયાદની સુનાવણી ચાલતી હતી તે સમયે તેમાં કરાયેલા આરોપની આડ લઈને ચાર માસ અગાઉ વાજીદ અને અલી બેઉ તેમને હોસ્પિટલમાં મળવા આવેલાં. અમે મોટી નેશનલ ન્યૂઝ ચેનલોના મોટા ગજાના પત્રકાર છીએ તેવી ઓળખાણ આપીને બેઉ જણે પાંચ લાખ રૂપિયાની માંગણી કરીને જો રૂપિયા ના મળે તો તેમની વિરુધ્ધમાં ચુકાદો અપાવીને બધી જમીનો શ્રીસરકાર કરાવી દેવાની ધમકી આપેલી.

ફરિયાદી પોતે કોઈ ચોપાનિયાં મગાવતા નહોતા પરંતુ અજાણ્યા માણસો તેમના વિરુધ્ધ છપાયેલા સમાચારોવાળા ચોપાનિયાં આપી જતો હતો. 

એપ્રિલ મહિનામાં મામલતદારે ફરિયાદીની તરફેણમાં ચુકાદો આપ્યો ત્યારબાદ બેઉ જણ તેમને હોસ્પિટલમાં મળવા આવેલાં. તે સમયે વાજીદ ચાકી કમરે રિવોલ્વર લટકાવીને આવેલો અને ફરિયાદીને ડરાવવા માટે તેનું ધ્યાન રિવોલ્વર તરફ જાય તે રીતે વારેવારે ઈશારા કરતો હતો. બેઉ જણે ડેપ્યુટી કલેક્ટરમાં રિવિઝન અરજી દાખલ કરાવી, મામલતદારનો હુકમ રદ્દ કરાવીને જમીનો શ્રીસરકાર કરાવી દેવાની ધમકી આપી તથા છાપાઓમાં બદનામ કરતાં સમાચારો પ્રગટ કરાવવાની ધમકી આપીને ફરી પાંચ લાખ રૂપિયા માંગેલા.

એક તબક્કે ડરી ગયેલાં ફરિયાદીએ રૂપિયા આપવાની તૈયારી પણ કરી લીધેલી પરંતુ હોસ્પિટલમાં કામ કરતા તેમના માણસ મુસ્તાક ચાકીએ આ બેઉ જણાનો પત્રકારના નામે આ જ ધંધો છે, રૂપિયા ના અપાય કહીને ફરિયાદીને હિંમત બંધાવી હતી.

વધુ  એકવખત બેઉ જણે જુદાં જુદાં ફરફરિયાઓમાં ફરિયાદી વિરુધ્ધ જાણે તે જમીનનો મોટો કૌભાંડીયો હોય તે પ્રકારના આરોપ સાથેના બદનક્ષીકારક સમાચારો પ્રગટ કરાવેલાં. કોઈક સમાચારમાં અલી ચાકીને જાગૃત નાગરિક તરીકે કોઈક છાપામાં આરટીઆઈ એક્ટિવિસ્ટ તરીકે ટાંકવામાં આવ્યો હતો.

સમાચારોનો બીજો રાઉન્ડ પૂરો કરીને બંને જણા ત્રીજીવાર ડૉક્ટરને મળવા હોસ્પિટલમાં આવેલાં અને ફરી એ જ ધમકીઓ આપીને પાંચ લાખ આપી દેશો તો બીજા દિવસથી સમાચારો બંધ થઈ જશે નહિતર છેલ્લે હોસ્પિટલ બંધ કરવાનો વારો આવશે.

પૂર્વ આઈજીની સૂચના છતાં લાયસન્સ રદ્દ ના થયું

૧૪-૧૨-૨૦૨૨ના રોજ ભુજ આરટીઓ કચેરીમાં આરટીઓ ઈન્સ્પેક્ટર ડી.એમ. પંચાલે પોતાને ગાળો ભાંડીને માથાકૂટ કરવા બદલ વાજીદ ચાકી સહિત ચાર લોકો સામે ભુજ બી ડિવિઝન પોલીસ મથકે સરકારી કર્મચારીની ફરજમાં રૂકાવટ, ધાક ધમકી, જાહેરનામા ભંગ સબબની કલમો તળે ફરિયાદ નોંધાવેલી. તે સમયે પોલીસે તેની રિવોલ્વર કબજે કરી લીધી હતી. આ બનાવને ગંભીરતાથી લઈ તત્કાલિન રેન્જ આઈજી મોથલિયાએ વાજીદની રિવોલ્વરનું લાયસન્સ કેન્સલ કરાવવા પોલીસને ખાસ સૂચના આપી હતી. વરિષ્ઠ અધિકારીની ખાસ સૂચના છતાં પોલીસે લાયસન્સ કેન્સલ કરવા કેમ કોઈ કાર્યવાહી ના કરી તે બાબત તપાસનો વિષય છે.