ગાંધીધામના સુભાષનગરમાં રહેતા ૪૬ વર્ષિય દીપક ખેંગારભાઈ મજેઠીયા ઈમ્પોર્ટ થયેલા માલના કસ્ટમ ક્લિયરન્સનું કામકાજ કરતી શિપીંગ એન્ડ લોજિસ્ટીક્સ પેઢી ધરાવે છે. તેમને બિન ખેતીની જમીનમાં ઈન્વેસ્ટમેન્ટ કરવામાં રસ હોઈ ગાંધીધામના દલાલ યોગેશ ઠક્કર જોડે વાતચીત કરતા રહેતા હતા.

નીતેશે ફરિયાદીને મુંદરાના પ્રાગપરના સર્વે નંબર ૨૬૩ અને ૨૬૪ના જમીનના સોદા અંગે વાતચીત કરીને મુંબઈ રહેતા જમીનના માલિક દીપક મેઘજી ગાલા સાથે તેણે કરેલો સાટા કરારનો દસ્તાવેજ બતાડ્યો હતો.

સોદો નક્કી થયાં બાદ દલાલ યોગેશ ઠક્કર અને કિશોર પીંગળની સાક્ષીએ નીતેશ ગઢવી અને ફરિયાદી વચ્ચે આ જમીનનો નવો નોટરાઈઝ્ડ સાટા કરાર બનાવાયો હતો અને ફરિયાદીએ બાના પેટે નીતેશને એક કરોડ રૂપિયા આપ્યા હતા. ત્યારબાદ, ૨૮-૧૨-૨૦૨૩થી ૩૦-૦૫-૨૦૨૪ના સમયગાળા દરમિયાન અલગ અલગ સમયે ફરિયાદીએ નીતેશ અને જમીન માલિક દીપકને બેન્ક મારફતે તથા કિશોરની ઓફિસમાં ટુકડે ટુકડે સોદા મુજબ નક્કી થયેલાં ૫ કરોડ ૩ લાખ રૂપિયા ચૂકવી આપ્યાં હતા.

દરમિયાન, નીતેશ અને દીપકે ૦૪-૦૧-૨૦૨૫ના રોજ આ જમીન કોઈ ત્રીજી જ પાર્ટીને વેચી મારી હોવાનું બહાર આવેલું. ફરિયાદીએ સમગ્ર ઠગાઈકાંડ આચરાયો તેના સાક્ષી તરીકે યોગેશ ઠક્કર, કિશોર પીંગળ અને હિતેષ ઠક્કર હોવાનું લખાવ્યું છે. ગાંધીધામ બી ડિવિઝન પોલીસે ગુનો નોંધી તપાસ હાથ ધરી છે.