આ બાબતે જે-તે સમયે સરપંચ ગણેશા સામતા ગારીયાએ મોહનને બે-ત્રણ વખત ફોન કરીને ગાંધીનગરમાં રજૂઆતો ના કરવા જણાવેલું અને બેઉની જે-તે સમયે ફોન પર બોલાચાલી પણ થયેલી. દરમિયાન, બુધવારે બપોરે મોહન તેના પિતાને બાઈક પર બેસાડીને ખેતરેથી ઘર તરફ જતો હતો ત્યારે ગામના સીમાડે તળાવના વોકળા વચ્ચે ઈશ્વર અખઈ ગારીયા અને માદેવા દેવરાજ ગારીયા બાઈક ધોતા હતા.

મોહન ઘર તરફ જવા રવાના થયો ત્યારે રવા અજમલ ગારીયાએ તેના ઘર પાસે રસ્તામાં ટ્રેક્ટર આડું રાખી દીધું હતું. રવા સાથે સરપંચ ગણેશા, પ્રવિણ વીરભાણ ગારીયા અને રમેશ ભારમલ ગારીયા હાથમાં લોખંડની કોસ સાથે ઊભેલાં. ચારેય જણે મોહન અને તેના પિતા પર હુમલો કરીને માર મારેલો. બબાલ સમયે ખેતરેથી ઘરે આવી રહેલા મોહનના ભાઈ જયંતીને પણ આરોપીઓએ માર માર્યો હતો. હુમલામાં મોહનને કોસ વાગતા એક આંખે ગંભીર ઈજા થઈ છે. તેના પિતાને પણ શરીરે ઈજાઓ પહોંચી છે. બેઉને રાપરની સરકારી હોસ્પિટલથી ગાંધીધામની રામબાગ હોસ્પિટલમાં ખસેડાયાં છે.