પોલીસે કેમિકલયુક્ત નકલી દારૂ ભરેલાં રોયલ ચેલેન્જ બ્રાન્ડના ૧૮૦ એમએલ ક્વાર્ટરિયાની ૬૦૦ નંગ બાટલીઓ તથા ૯૪૦૦ નંગ ખાલી બાટલીઓ, જપ્ત કરી છે. દુકાનમાંથી બાટલીઓને સીલ કરવાનું મશીન અને કલર એસેન્સ, થર્મોમીટર, એક બાઈક વગેરે મળી ૭.૩૮ લાખનો મુદ્દામાલ કબજે કર્યો છે.

પોલીસે મૂળ રાપરના વતની અને મુંબઈમાં સ્થાયી થયેલાં હિતેશ ખીમજી બાંભણીયા (ઉ.વ. ૩૩) અને તેણે કામે રાખેલાં બ્રિજેશ ઊર્ફે રાધાકિશન ડાલચંદ જાટ (ઉ.વ. ૪૪, રહે. મૂળ મથુરા, યુપી)ની ધરપકડ કરી છે. પ્રાથમિક માહિતી મુજબ બે ત્રણ દિવસ અગાઉ જ આરોપીઓએ ભાડા પર મેળવેલી દુકાનમાં આ ગોરખધંધો શરૂ કર્યો હતો.

પ્રાથમિક પૂછપરછમાં હિતેશે આ કેમિકલ મહારાષ્ટ્રથી લાવ્યો હોવાનું કબૂલ્યું છે. હિતેશ અગાઉ એકવાર દારૂની બાટલીઓ સાથે અંજાર અને વાપી અંકલેશ્વર પોલીસના હાથે ઝડપાઈ ચૂકેલો છે.

બોર્ડર રેન્જ આઈજી ચિરાગ કોરડીયાની સૂચના અંતર્ગત પોલીસ ઇન્સ્પેક્ટર એલ.પી. બોડાણાના માર્ગદર્શન હેઠળ પીએસઆઈ એમ.એચ. જાડેજા, એ.પી. વાઘેલા, ડી.સી. ઠાકોર સહિતની ટીમે દરોડો પાડ્યો હતો.