ફરિયાદીએ જણાવ્યું કે સૌપ્રથમવાર ૧૭ ઑગસ્ટે અજાણ્યા નંબર પરથી તેમને વોટસએપ મેસેજ મળ્યો હતો. મેસેજ મોકલનારે પોતાનો ફોટો મોકલી પોતાનું નામ નર્મદા દિનેશભાઈ વાળંદ હોવાનું જણાવી તેને આશા વર્કર તરીકે મેઘપરમાં કામ કરવું હોવાનું જણાવેલું. ડૉ. અંજારીયાએ કોઈ પ્રત્યુત્તર ના વાળતાં નર્મદાએ તેમને ફોન કરીને ફરિયાદીની અંજાર ઑફિસે રૂબરૂ મળવા ઈચ્છતી હોવાનું જણાવી બપોરે ત્રણ વાગ્યે રૂબરૂ મળવા આવેલી.

ત્યારબાદ નર્મદાએ ફરિયાદીને સવાર સાંજ પોતાના ફોટોગ્રાફ સાથે ગુડ મોર્નિંગ અને ગુડ નાઈટના મેસેજ મોકલવાનું શરૂ કરીને પરિચય વધુ ઘનિષ્ઠ બનાવવાનું શરૂ કરેલું. વધુ એકવાર તે રૂબરૂ ઑફિસે આવેલી અને ફરિયાદી સાથે વોટસએપ કૉલ પર પણ અવારનવાર વાતચીત કરતી હતી. નર્મદા ફરિયાદીને અવારનવાર ઘરે ચા-પાણી માટે બોલાવતી હતી.

શનિવાર ૨૧ સપ્ટેમ્બરે સવારે નર્મદાએ પોતે હાલ અંતરજાળ ખાતે રાજનગરમાં માતા પિતાને ઘેર રોકાવા આવી હોવાનું કહી માતા પિતા પણ મળવા ઈચ્છતાં હોવાનું જણાવી ફરિયાદીને ઘેર બોલાવ્યાં હતાં. ફરિયાદી ઘેર ગયાં ત્યારે તેના માતા પિતા કોઈ હાજર નહોતાં. નર્મદાએ તેમને રૂમમાં બેસાડીને ચા પાણી પીવડાવ્યાં હતા અને પછી અચાનક તેના ઉપરનાં વસ્ત્રો કાઢી નાખ્યાં હતાં. એટલામાં દિનેશ નામનો નર્મદાનો કહેવાતો પતિ અચાનક ઘરમાં આવી ચઢ્યો હતો.

‘તેં મારી જિંદગી બરબાદ કરી નાખી’ કહીને દિનેશે ફરિયાદીને બે ત્રણ મુક્કા માર્યાં હતાં. ‘હવે તો તને નહીં છોડું’ કહીને ફરિયાદીનો શર્ટ ઉતારાવી, બાજુમાં નર્મદાને બોલાવી બેઉની વીડિયો ક્લિપ રેકોર્ડ કરી લીધી હતી. ત્યારબાદ દિનેશે વીડિયો ક્લિપ વાયરલ કરવાની અને બળાત્કારની ખોટી ફરિયાદ નોંધાવવાની ધમકી આપીને ફરિયાદી પાસે પતાવટ પેઠે ૩૦ લાખ રૂપિયાની માંગણી કરી હતી. ફરિયાદીએ ઑફિસે જઈ તત્કાળ પચાસ હજાર રૂપિયા આપવાનું અને બાકીના નાણાં વ્યવસ્થા કર્યા બાદ આપવાનું કહેલું.

ગુલામ હાજી ઊર્ફે દિલીપ વાળંદ ફરિયાદી અને નર્મદાને પોતાની સ્વિફ્ટ કારમાં બેસાડીને ફરિયાદીની ઑફિસે આવેલો. ફરિયાદીએ પોતાની પાસે રહેલી ચેકબૂકમાંથી પચાસ હજાર રૂપિયાનો બેરર ચેક લખીને પ્યૂનને બેન્કમાં જઈ નાણાં લઈ આવવા મોકલેલો.

મંગળવારે ગુલામે ફરિયાદીને વોટસએપ કૉલ કરીને નાણાંની ઉઘરાણી કરેલી. ફરિયાદીએ નાણાંની વ્યવસ્થા ના થઈ શકી હોવાનું જણાવતાં બુધવાર સુધીમાં રૂપિયાની વ્યવસ્થા કરાવી દેવાની નહિતર બળાત્કારની ખોટી ફરિયાદમાં ફીટ કરાવી દેવાની ધમકી આપી હતી. બનાવ અંગે ફરિયાદીએ પોતાના બનેવીને સમગ્ર વાત કરી હતી અને બાદમાં ફરિયાદ લખાવવા મોડી રાત્રે આદિપુર પોલીસ મથકે પહોંચ્યાં હતાં.