પાંચ દિવસ અગાઉ ગત શનિવારે નવા અંજારની જૈન કોલોનીમાં રહેતા એડવોકેટ પારસ મુલચંદાણીના ઘરમાંથી ૮.૯૯ લાખના સોના ચાંદીના ઘરેણાં, ચાંદીના વાસણો અને ૧.૬૦ લાખ રોકડાં મળી ૧૦.૫૯ લાખની કિંમતની માલમતાની ચોરી થતાં પોલીસ ચોંકી ઉઠી હતી.

ચોરીના બનાવનો ભેદ ઉકેલવા રેન્જ આઈજી ચિરાગ કોરડીયા, એસપી સાગર બાગમાર અને ડીવાયએસપી મુકેશ ચૌધરીની સૂચના માર્ગદર્શન હેઠળ અંજારના પીઆઈ અજયસિંહ ગોહિલે પીએસઆઈ એસ.જી. વાળા સાથે મળી જુદી જુદી નવ ટીમ બનાવીને સૌને અલગ અલગ કામગીરી સોંપી હતી.

સીસીટીવી ફૂટેજના આધારે આ તસ્કરોનું પગેરું મળેલું. સીસીટીવીના આધારે પોલીસ પગેરું દબાવતાં દબાવતાં ગાંધીધામના ખોડિયારનગર પહોંચી હતી. તસ્કરો આઈડેન્ટીફાય થઈ ગયાં બાદ તેમને બાઈક પર ચોરીનો માલ લઈને સગેવગે કરવા જતી વેળા મેઘપર કુંભારડી બસ સ્ટેન્ડ પાસેથી દબોચી લીધા હતાં.

પોલીસે ઝડપેલાં અજય પોપટભાઈ દેવીપૂજક (ઉ.વ. ૧૯) અને મુકેશ વિનોદભાઈ દેવીપૂજક (ઉ.વ. ૨૦) બેઉ મૂળ ડીસાના રહેવાસી છે. થોડાંક મહિનાથી તેઓ ખોડિયાનગરમાં સંબંધીના ઘેર આવેલાં. સંબંધીના બે ટાબરીયા સાથે મળીને તેમણે ચોરી કરવાનું શરૂ કરેલું. આ ગેંગ બંધ મકાનોની રેકી કરીને, મકાનના પાછલાં બારણેથી અંદર પ્રવેશ કરી ચોરીઓ કરે છે. અંજાર પોલીસે ગેંગ પાસેથી રોકડાં ૧.૧૩ લાખ અને અન્ય ચોરેલાં ઘરેણાં, વાસણો વગેરે મળી ૮.૭૧ લાખનો મુદ્દામાલ રીકવર કર્યો છે.

૦૯-૧૧-૨૦૨૫ના રોજ અંતરજાળના ઘનશ્યામનગરમાં રહેતા બાબુભાઈ હમીરભાઈ આહીરના ઘરમાં પણ ૫.૭૦ લાખના ઘરેણાં અને ૧.૭૦ લાખ રોકડાં મળી ૭.૪૦ લાખ રૂપિયાની ચોરી કરેલી. બાબુભાઈ સવારે સાડા દસ વાગ્યે ઘરને લૉક મારીને પત્ની સાથે નંદગામમાં કથા સાંભળવા ગયેલાં. ત્યારબાદ આ ટોળકીએ ઘરના પાછલા દરવાજાથી અંદર પ્રવેશ કરીને ચોરી કરી હતી. તેમની પાસેથી પોલીસે દોઢ લાખની એક બંગડી રીકવર કરી છે.

અંજારની જેમ રાપર પોલીસે પણ ફતેહગઢ ગામે જ્વેલર્સની દુકાનના તાળાં તોડી ચોરી કરવાના ગુનાનો  ભેદ સીસીટીવી ફૂટેજના આધારે ઉકેલીને મૂળ મધ્યપ્રદેશની ગેંગના બે ચોરની ધરપકડ કરી છે. પોલીસે પકડેલો મુકેશ આમલીયાર અને રમેશ બઘેલ બેઉ એમપીના વતની છે.

પોલીસે મુકેશને હળવદથી અને રમેશને અમરેલીથી ઝડપી પાડીને એક મોટર સાયકલ અને ૪૩ હજારની કિંમતના ચાંદીના વિવિધ દાગીના રીકવર કર્યાં છે. કામગીરીમાં રાપર પીઆઈ જે.બી. બુબડીયા, પીએસઆઈ વી.એચ. કાતરીયા અને રાપર પોલીસનો સ્ટાફ જોડાયો હતો.