ગવલો છેલ્લાં દોઢેક માસથી દારૂના ગુનામાં જેલમાં કેદ છે. ‘ગવલો ક્યાં, ગવલો ક્યાં છે’ કહેતી ટોળકીએ ઘરમાં ઘૂસી જઈને ધોકાથી કાચની ટીપૉઈ તોડી નાખીને મંદિરના ખાનામાં રહેલા ૧૨ હજાર રોકડાં રૂપિયા લઈ લીધા હતા. ઘરમાં હાજર ભાવનાબેન નામની કામવાળી બાઈને પગમાં ધોકો મારેલો.

યુપી બિહારની જેમ ધોળા દિવસે પોલીસની ધાકના ધજાગરા ઊડાડતી આ ઘટનાને ગંભીરતાથી લઈ બી ડિવિઝન પોલીસે એક્શનમાં આવીને સીસીટીવી તથા અન્ય ટેકનિકલ સર્વેલન્સના આધારે બનાવની રાત્રે જ ત્રણ ટપોરીને દબોચી લીધાં હતા. બાદમાં અન્ય ચાર ગુંડાને ઝડપી પાડ્યાં છે.

પકડાયેલા ગુંડાઓમાં ફારુક દિલાવર ઝેડા, સાહિલ અબ્દુલ મોવર, ઈબ્રાહિમ મુસ્તાક કાજડીયા, હુસેન ઈકબાલ ભટ્ટી (રહે. તમામ માળિયા, મોરબી), નિઝામુદ્દીન અન્સારી અને મેરાજઅલી રમજાનઅલી (બંને રહે. કંડલા રેલવે ઝૂંપડા, મૂળ રહે. યુપી)નો સમાવેશ થાય છે. આદમ, સદ્દામ અને કિશોર વયના એક આરોપી સહિત ત્રણ ગુંડા હજુ પોલીસના હાથ લાગ્યા નથી. અંગત અદાવતમાં તેમણે ગુંડાગીરી આચરી હોવાનું પોલીસ માની રહી છે.

ફારૂક ઝેડા સામે મોરબી, માળિયા અને સામખિયાળીમાં હત્યાનો પ્રયાસ, લૂંટ, આર્મ્સ એક્ટ, પ્રોહિબિશન સહિતના ૨૦થી વધુ ગુના નોંધાયેલાં છે. સાહિલ મોવર સામે મોરબીમાં બે વર્ષ અગાઉ લૂટ વીથ મર્ડરનો ગુનો નોંધાયેલો છે. હુસેન ભટ્ટી સામે માળિયા અને લાકડીયા પોલીસ સ્ટેશનમાં હત્યાના પ્રયાસ, જુગારધારા, દારૂબંધીને લગતાં ચાર ગુના નોંધાયેલાં છે.

ઓળખ પરેડ બાદ ઘટનાસ્થળે લઈ જઈને પીઆઈ એસ.વી. ગોજીયા, પીએસઆઈ એલ.એન. વાઢિયા, એસ.જે. પઢાર, કે.જે. વાઢેર સહિતના સર્વેલન્સ સ્ટાફે બનાવનું રીકન્સ્ટ્રક્શન પંચનામું કર્યું હતું. તે સમયે લંગડાતા ચાલતાં ગુંડાઓને જોવા લોકો એકત્ર થઈ ગયા હતા. પોલીસે લૂંટાયેલી મોપેડ, સાડા ૪ હજાર રોકડાં રૂપિયા, ૬ ધોકા, ગુનામાં વપરાયેલી ઈકો કાર, એક બાઈક વગેરે મુદ્દામાલ કબજે કર્યો છે.