માનકૂવામાં રહેતા ૨૯ વર્ષિય વિનોદ દામજીભાઈ મેરિયાએ ગઈ ૭મી જૂનની સવારે ઘરમાં ગળેફાંસો ખાઈ આત્મહત્યા કરી લીધી હતી.

મરતાં અગાઉ વિનોદે તેના મોબાઈલમાં પોતાનું એક બયાન રેકોર્ડ કર્યું હતું. જેમાં પોતે પત્ની રેખા, સાસુ બબીબેન અને માસીજી ડાઈબેનના ત્રાસથી આત્મહત્યા કરી રહ્યો હોવાનું જણાવ્યું હતું. આ પુરાવાના આધારે માનકૂવા પોલીસ મથકે વિનોદના પિતાએ ત્રણે સામે પુત્રને મરવા માટે મજબૂર કર્યાની ફરિયાદ નોંધાવી છે.

ફરિયાદી દામજીભાઈએ પોલીસને જણાવ્યું કે ત્રણ વર્ષ અગાઉ વિનોદના લગ્ન અંજારના ખંભરા ગામે રહેતી રેખા કેશાભાઈ બડીયા (મૂળ રહે. ખારીરોહર, ગાંધીધામ) સાથે થયેલાં. લગ્ન જીવન દરમિયાન પુત્રી જન્મેલી જે આજે દોઢ વર્ષની છે. એક વર્ષ લગ્નજીવન સુખેથી ચાલ્યું પણ પછી રેખાએ વિનોદને ત્રાસ આપવાનું શરૂ કરેલું.

વિનોદની સાસુ અને માસી સાસુ પણ દીકરીને સાચવી શકતા નથી તો લગ્ન કેમ કરેલાં તેમ કહીને જમાઈને સતત મહેણાં ટોણાં માર્યાં કરતાં. વિનોદે આપઘાત કર્યો તેના દસેક દિવસ અગાઉ વધુ એકવાર રેખા ઝઘડો કરીને દીકરીને લઈ પિયર જતી રહેલી. આ બધું સહન ના થતાં અંતે વિનોદે આત્મહત્યા કરી લીધી. પોલીસે ગુનો નોંધી તપાસ હાથ ધરી છે.