દારુની મજા માણતાં માણતાં તાશ વડે તીનપત્તી રમતાં પકડાયેલા પૂર્વ IAS સહિતના સાત ખેલીઓ પૈકી ચિરાગ બળદેવભાઈ ડુડીયા ભુજમાં માર્ગ અને મકાન કચેરીના પેટા વિભાગમાં નાયબ કાર્યપાલક ઈજનેર તરીકે નોકરી કરે છે.

એ જ રીતે, માર્ગ અને મકાન વિભાગના રાપર પેટા વિભાગના નાયબ કાર્યપાલક ઈજનેર સંજય પ્રવિણભાઈની અટક રામજીયાણી છે, આખું ગામ તેમને એસ.પી. રામજીયાણી તરીકે ઓળખે છે પરંતુ એફઆઈઆરમાં રામજીયાણીના બદલે પટેલ અટક દર્શાવાઈ છે.

માર્ગ અને મકાન વિભાગના અધીક્ષક ઈજનેર કે.બી. નાયીએ બેઉ જણ રજા પર છે કે કેમ તે અંગે અજાણતા દર્શાવી છે. પીઆઈએ તો ગઈકાલથી જ મૌનવ્રત ધારણ કરી લીધું છે! સરકારી રેકર્ડ પર ખોટું નામ કે અટક લખાવવા તે ફોજદારી ગુનો બને છે.

થ્રી-સ્ટાર હોટેલના એર કન્ડિશન્ડ સ્યૂટમાં દારુ જુગારની મહેફિલ માણી રહેલા નિવૃત્ત અને વર્તમાન સરકારી અધિકારીઓ પર કોણે રેઈડ કરાવી તે અંગે સૂત્રોમાંથી નવી વાત જાણવા મળી છે. જે રૂમમાં મહેફિલ જામી હતી તે રૂમની બાજુમાં ગુજરાતના કોઈ વરિષ્ઠ પોલીસ અધિકારી રોકાયાં હતા.

ભુજ પોલીસે જ્યારે દરોડો પાડ્યો ત્યારે બંધ રૂમની બહાર પણ તેમનો શોરબકોર સંભળાતો હતો. નજીકના રૂમમાં રોકાયેલા પોલીસ અધિકારીએ છાકટાં અધિકારીઓના શોરબકોરથી ત્રાસીને પોલીસને ફોન કરીને જાણ કરી હતી.

DySPનું વૉરન્ટ કઢાવીને ભુજ પોલીસે હોટેલમાં રેઈડ પાડી ત્યારે સૌને આરોપીઓ હાઈ પ્રોફાઈલ હોવાનો અંદાજ હતો જ. આમ તો કાયદો સૌ માટે સમાન હોય પરંતુ ખેલીઓ વગદાર હોઈ તેમને રાતોરાત જામીન પર મુક્ત કરી દેવાયાં. તેમના ફોટા સાથેની પ્રેસનોટ પણ ધરાર જારી ના કરાઈ.

ગુનો દાખલ કર્યા બાદ પત્રકારોને એફઆઈઆરની કોપી ના મળે તે હેતુથી એફઆઈઆરને ‘સંવેદનશીલ’ કરી દેવા માટે ઓપરેટરને સૂચના અપાઈ હતી પરંતુ ઓપરેટરે ભૂલથી એફઆઈઆર ‘સંવેદનશીલ’ ના કરતાં તેની કોપી ગામમાં વાયરલ થવા માંડી હતી તેવો પણ સૂત્રો દાવો કરે છે. આ ચર્ચાઓ વિશે ભુજ પીઆઈનો કશો ખુલાસો સાંપડ્યો નથી.