પોલીસે કારની ગહન તલાશી લેતાં તેમાં બનાવેલાં ગુપ્ત ખાનામાં છૂપાવેલાં રોકડાં ૬ લાખ રૂપિયા સાથે ચોરી માટે વપરાતાં ઓજારો જેવા કે ગણેશિયો, કટર, ડીસમીસ, એડજસ્ટેબલ પાનું, ૬ માસ્ક, બે હાથ મોજા મળી આવ્યાં છે.

પ્રાથમિક પૂછપરછમાં આ ગેંગે વર્તમાન ૨૦૨૬ના વર્ષમાં માધાપર, પધ્ધર, નલિયા, કોઠારા, વાયોરમાં કરેલી ઘરફોડ ઉપરાંત ૨૦૨૪ના વર્ષમાં માંડવીમાં કરેલી ત્રણ ઘરફોડ મળી કુલ ૭ ગુનાની કબૂલાત કરી છે.

પોલીસે ગેંગની મોડસ ઓપરેન્ડી અંગે જણાવ્યું કે આ ગેંગ ચોરી કરવા માટે જુદાં જુદાં વાહનો મારફતે મધ્યપ્રદેશથી નીકળી નક્કી કરેલાં શહેરોમાં જતી. ગુગલ મેપથી શહેરની ભાગોળે આવેલી મોટી ટાઉનશીપ અને પૉશ વિસ્તારોને સર્ચ કરી લોકેશન નક્કી કરતાં. જે લોકેશન નક્કી કર્યું હોય તેની આસપાસની બાવળની ઝાડીઓમાં ચારથી પાંચ કલાક સંતાઈ રહેતા અને નજીકમાં રોડ પર વાહન રાખીને ડ્રાઈવરને એક ચોક્કસ ટાઈમ આપી દેતાં.

ચોરીનો માલ લઈને અગાઉથી જણાવેલાં લોકેશન અને સમયે ડ્રાઈવર સાથે હાજર વાહનમાં બેસીને નાસી જતાં. ચોરીનો માલ વાહનના ગુપ્ત ખાનાઓમાં સંતાડી દેતાં અને વતનમાં જઈ સોનીઓને માલ વેચી મારી ભાગ કરી ખાતાં.

ગેંગની પૂછપરછમાં કચ્છના સાત ગુના ઉપરાંત વડોદરા, અમદાવાદ, અમરેલી, ભાવનગરના ચાર ગુના અને કર્ણાટક, એમપી, રાજસ્થાનમાં કરેલાં ઘરફોડના બે ગુનાનો ભેદ ખૂલ્યો છે. ૨૦૨૨માં મુંદરામાં થયેલી ઘરફોડ અને પોરબંદરની ચોરીના ગુનામાં આ ગેંગ નાસતી ફરતી હતી. લોકલ ક્રાઈમ બ્રાન્ચના પીઆઈ એ.એમ. મકવાણા, પીએસઆઈ જે.બી. જાદવ, એમચ.એચ. શિણોલ સહિતની ટીમે આ ખૂંખાર ચડ્ડીધારી ગેંગને દબોચવામાં ઘણી જહેમત ઉઠાવી છે.