જાહેરાતમાં આપેલા નંબર પર ડૉક્ટરે સંપર્ક કરતાં સાયબર ચીટરોએ તેમને એક લિન્ક અને એક મોબાઈલ નંબર મોકલ્યો હતો. લિન્ક મારફત તેમણે તેમનું રજિસ્ટ્રેશન કરાવેલું. ચીટરોએ આપેલા નંબર પર વાત કરતા સંહિથા રેડ્ડી નામની વ્યક્તિએ પોતે કેટાલિસ્ટ માર્કેટ લિમિટેડ કંપનીની મેમ્બર હોવાની ઓળખાણ આપીને IDFC બેન્કનો એક ખાતા નંબર આપીને તેમાં મિનિમમ ત્રણ લાખ રૂપિયા જમા કરાવવા અને રૂપિયા જમા કરાવ્યા બાદ તે ઓનલાઈન ટ્રેડિંગ કરી શકશે તેમ જણાવેલું. જેથી તબીબે ત્રણ લાખ રૂપિયા જમા કરાવતાં તે રકમ તેમના ઓનલાઈન વૉલેટ (ખાતા)માં આવી ગઈ હતી.

ડૉક્ટરે કંપનીની ટીપ્સ મુજબ ટ્રેડિંગ શરૂ કરેલું અને તેમાં સારો પ્રોફિટ થવા માંડેલો. તમામ રકમ તેમના વૉલેટમાં જમા થતી હતી. સંહિથા રેડ્ડીએ ડૉક્ટરનો ફરી સંપર્ક કરીને જો તમે હજુ વધુ રૂપિયા વૉલેટમાં જમા કરાવીને ટ્રેડિંગના વધુ સ્લૉટ મેળવશો વધુ ફાયદો થશે તેમ કહેતાં ડૉક્ટરે સૌપ્રથમ જમા કરાવેલા ત્રણ લાખ ઉપરાંત ટૂકડે ટૂકડે વધુ ૨૧ લાખ મળી ૨૪ લાખ જમા કરાવ્યા હતા.

થોડાંક દિવસો ટ્રેડિંગ કર્યાં બાદ સારો પ્રોફિટ બૂક થતાં ડૉક્ટરે વૉલેટમાંથી નાણાં ઉપાડવા પ્રયાસ કરેલો. જો કે, કરન્સી ડિફરન્સ ચાર્જ સહિત વિવિધ ચાર્જના બહાને ચીટરોએ તેમની પાસે વધુ ૧૭ લાખ ૬ હજાર રૂપિયા જમા કરાવડાવ્યા હતા. ત્યારબાદ પણ તેમને નાણાં પરત મળ્યાં નહોતાં.

પોતાની સાથે છેતરપિંડી થઈ હોવાનું પામી ગયેલા ડૉક્ટરે ૨૦ એપ્રિલના રોજ ઓનલાઈન સાયબર ક્રાઈમ હેલ્પલાઈન પર ફરિયાદ આપી હતી. જેના પગલે બોર્ડર રેન્જ સાયબર ક્રાઈમ પોલીસ સ્ટેશનમાં ફરિયાદ નોંધાવી છે.