અગાઉ આ કહેવાતા સાહેબ અને તેની ટીમની જુગલબંધી અંગે જાહેરમાં સવાલો ઉઠાવનારાને આ જોડીએ યુક્તિપૂર્વક ટ્રેપ કરીને ફસાવ્યો હતો. પૈસાની લાલચ એટલી હદે છે કે સાહેબને જ્યાં સુધી પોઝીશન પર છે ત્યાં સુધી કમાઈ લેવાની લ્હાય છે. આત્મસન્માન, નૈતિક્તા, લાજ શરમ તો ઊભી બજારે વેચી નાખી છે!

ગત ૨૦મી ફેબ્રુઆરીએ SMCએ ભુજના વડવારા ગામની સીમમાં એક બંધ પ્લાન્ટમાં કટીંગ સમયે દરોડો પાડીને ૪ કરોડ ૮૫ લાખના દારૂનો વિક્રમી જથ્થો જપ્ત કરેલો. સ્થળ પરથી  ફક્ત બે જણ હાથમાં આવેલાં અને ૨૦ આરોપીઓ નાસી ગયેલાં. રેઈડના પગલે પધ્ધર પોલીસ સ્ટેશનના પીઆઈ અને ડી-સ્ટાફ સામે બદલી અને સસ્પેન્સનની કડક કાર્યવાહી કરાયેલી. ગુનાની તપાસ મુંદરાના ASP ગૌતમ વિવેકાનંદન કરી રહ્યાં છે.

દારૂ મગાવનારાં ૨૦ બૂટલેગરો પૈકી બે મહિના દરમિયાન જેકી બાવાજી, શિવરાજ ગઢવી અને ગોપાલ મારાજ નામના ત્રણ આરોપી જ પકડાયાં છે. સૂત્રધાર અનોપસિંહ સહિતના ૧૭ જણાં હજુ હાથ લાગ્યાં નથી! ફરાર બૂટલેગરોમાં એક આરોપી હાર્દિક બાવાજી પણ હતો.

માધાપરમાં સોની સમાજવાડી પાસે મુખ્ય પોઈન્ટ ઉપરાંત કેસરબાગ અને નળવાળા સર્કલ પાસે પણ પોઈન્ટ ચાલુ થયાં છે. છેક ભુજથી પ્યાસીઓ અહીં સુધી લાંબા થાય છે.

કેસરબાગ પાસે મેન્દ્રો કોલી નામનો દેશી દારૂનો બૂટલેગર પણ છૂટથી દેશી દારૂ વેચી રહ્યો છે. સાંજ પડે ને અહીં રીતસર પ્યાસીઓનો મેળો ભરાય છે. ઉપરથી લઈ નીચે સુધી મહિને લાખો રૂપિયાનો ‘પ્રસાદ’ વહેંચતા લિસ્ટેડ બૂટલેગર મેન્દ્રા કોલીએ પ્યાસીઓને સ્થળ પર પીવાની સગવડ માટે દિવાલબંધ શેડવાળો અડ્ડો બનાવ્યો છે. પોલીસના દંભની પરાકાષ્ઠા તો જૂઓ કે ડ્રાઈવ વખતે અડ્ડા પરથી બે-ચાર પોટલીઓ લઈને કે દારૂ પીને નીકળતાં અનેક લોકોને નશાબંધીના ગુનામાં પકડીને ફીટ કરાય છે પરંતુ અડ્ડો બેરોકટોક ધમધમતો રહે છે!