મતદાર યાદી સુધારણાના નામે વહીવટી તંત્રના અધિકારીઓએ કચ્છમાં કાર્યરત ફેક્ટરીઓના પ્રબંધકોને તેમના એકમમાં કામ કરતાં પરપ્રાંતીય મજૂરોના નામ પણ નવા મતદારો તરીકે કચ્છની મતદાર યાદીમાં ચડાવી દીધા છે. અનેક એવા મતદારો છે કે જેમના નામ મુંબઈમાં પણ નોંધાયેલાં છે. ગાંધીધામના પટ્ટામાં અનેક એવા મતદારો છે કે જેમના નામ  શહેરો અને તેમના વતનના ગામડાઓમાં એમ બબ્બે જગ્યાએ નોંધાયેલા છે. આ મતદારો વિધાનસભા, પંચાયતો અને પાલિકાઓની ચૂંટણીઓમાં મતદાન કરે છે.

મુંદરા અને માંડવી વિધાનસભામાં અનેક પરપ્રાંતીય મજૂરોના નામ મતદાર તરીકે નોંધાયેલા છે. આ આંકડો અંદાજે પાંત્રીસ હજાર જેટલો હોવાનું જણાવતા હુંબલે મુંદરાના સમાઘોઘા ગામનો દાખલો આપતાં જણાવ્યું કે અહીં આવેલી જિન્દાલ કંપનીમાં કામ કરતાં પરપ્રાંતીય કર્મચારીઓ અને મજૂરોના નામ ફોર્મ ૬ના માધ્યમથી નવા મતદારો તરીકે ઉમેરી દેવાયાં છે. ચોપડા પર તેમની ઉંમર ૩૫, ૪૦ કે તેથી વધુ વર્ષની બોલે છે! હકીકતે પરપ્રાંતીય મજૂરોના નામ આ રીતે નવા મતદાર તરીકે જોડી જ ના શકાય. કારણ કે આ મજૂરોના તેમના રાજ્યમાં મતદાર તરીકે નામ નોંધાયેલાં છે.

સમાઘોઘા ગ્રામ પંચાયતમાં તો સરપંચ ગ્રામજનોની ઈચ્છાથી નહીં પરંતુ કંપનીની ઈચ્છાથી નીમાય છે! પંચાયતની બૉડીમાં ચાર પ્રતિનિધિઓ એવા છે કે જેઓ પરપ્રાંતીય છે!

માધાપર વર્ધમાનનગર ગ્રામ પંચાયતમાં નોંધાયેલા અનેક મતદારો ભુજ નગરપાલિકાના મતદારો તરીકે પણ નોંધાયેલા છે. એ જ રીતે, ગાંધીધામના ગળપાદર ગામમાં બીએસએફના ૧૧૦૦ જેટલા જવાનોના નામ મતદાર તરીકે નોંધાયેલાં છે. આમાંના મોટાભાગના જવાનો વર્ષો અગાઉ બદલી પામીને અન્યત્ર જતા રહ્યાં છે પરંતુ મતદાર યાદીમાંથી તેમના નામ કમી થતાં જ નથી. આવી જ હાલત રેલવે કર્મચારીઓ હોય તેવા મતદારોના નામની નોંધણીની છે.

હુંબલે ઉમેર્યું કે કાયદાની જોગવાઈ મુજબ કુલ વસતિની તુલનાએ મતદારોની સંખ્યા ૬૨ ટકાથી વધુ ના હોવી જોઈએ. પરંતુ, કચ્છમાં ૨૩.૬૩ લાખની વસતિ સામે કુલ નોંધાયેલા મતદારોનું પ્રમાણ ૭૦ ટકા જેટલું છે. આ પ્રમાણ જોતાં કચ્છમાં લાખોની સંખ્યામાં બોગસ અને બેવડા મતદારો નોંધાયા હોય તેમ જણાય છે. આ બધાની તપાસ જરૂરી છે. કોંગ્રેસ દ્વારા આ મામલે ચૂંટણી પંચ અને સ્થાનિક વહીવટી તંત્ર સમક્ષ તપાસ કરવા માટે રજૂઆત કરવામાં આવશે. રાહુલ ગાંધીના એક વ્યક્તિ એક વોટના અભિયાનને સમર્થન આપવા કોંગ્રેસ દ્વારા મશાલ રેલી સહિતના કાર્યક્રમોનું આયોજન કરાયું છે.