ઘટના છે ૨૦૧૬ની. માંડવી પોલીસ મથકે નજીકના દુર્ગાપુર ગામના કસ્તૂરબેન લિંબાણી અને તેમના પતિ કાનજીભાઈ હંસરાજ લિંબાણી, માયાભાઈ દેવજી મહેશ્વરી, ગોવિંદ મહેશ્વરી સહિતના છ આરોપીઓ સામે બોગસ દસ્તાવેજોથી મૃત વ્યક્તિને જીવિત દર્શાવી, તેના નામના પાવર ઑફ એટર્ની મારફતે સોનાની લગડી જેવી કિંમતી જમીન પોતાના નામે વેચાણ દસ્તાવેજ બનાવી, સરકારી ચોપડે તેની નોંધ પ્રમાણિત કરાવવા પ્રયાસ કરવા સબબ ગુનો નોંધાયો હતો.

બાદમાં પત્નીના નામે આ જમીનનું પોતાની ફેવરમાં પાવરનામું બનાવીને પતિ કાનજીએ જમીનની વેચસાટ કરવા સબ રજિસ્ટ્રાર કચેરીમાં પ્રયાસ કરેલો.

પોતે ખોટું કર્યું છે તે પકડાઈ જશે તેવી શક્યતા જણાતાં કાનજીભાઈએ સબ રજિસ્ટ્રારને વેચાણ દસ્તાવેજ રદ્દ કરવા અરજી કરેલી. પરંતુ, સરકારી ચોપડે બોગસ દસ્તાવેજો રજૂ કરાઈને મૃત વ્યક્તિની જમીન હડપ કરી લેવાઈ હોઈ ફોજદારી ફરિયાદ નોંધાઈ હતી.

આ ગુનામાં આરોપીઓએ ગુજરાત હાઈકૉર્ટમાં ફરિયાદ રદ્દબાતલ ઠેરવવા અરજી કરેલી. જો કે, વડી અદાલતે તેમાં લાગેલી એટ્રોસીટીની કલમને રદ્દ ઠેરવવા પૂરતી આંશિક રાહત આપીને ગુનામાં લાગેલી ઈપીકો કલમ ૧૨૦ (૨), ૪૬૫, ૪૬૭ અને ૪૭૧ હેઠળ કેસ ચલાવવા હુકમ કર્યો હતો.

આરોપી યુગલની ગુનામાં રહેલી સક્રિય સંડોવણી, પ્રથમદર્શનીય રીતે વર્તાઈ આવતી ભૂમિકા વગેરે પરિબળોને અનુલક્ષીને કૉર્ટે અરજી ફગાવી દીધી છે. મદદનીશ સરકારી વકીલ એસ.એ. મહેશ્વરીની દલીલો અને પ્રથમદર્શનીય પુરાવાના આધારે આઠમા અધિક સેશન્સ જજ તુષાર ખંધડીયાએ આ અરજી ફગાવી દીધી છે.

જમીન કૌભાંડમાં સંડોવાયેલા આરોપી યુગલની નવ નવ વર્ષ સુધી ધરપકડ ના થાય તેવી મહેરબાની પોલીસે શા માટે કરી હશે તે ચિંતા અને ચિંતનનો વિષય છે. પોલીસ હજુ પણ યુગલની ધરપકડ કરશે કે પછી ‘ગાંધીબાપુ છાપ કાગળોને માન આપીને’ હાઈકૉર્ટમાંથી આગોતરા મેળવવા માટે વધુ સમય આપશે તે જોવું રહ્યું.