ગઈકાલ રાતથી આજે દિવસભર ઈન્દુભાને પકડવા માટે ACBએ અનેક પ્રયાસો કર્યા પરંતુ આરોપી હાથ લાગ્યો નથી.

ACB કેસના ફરિયાદી સહિત ચાર લોકો સામે ગત મે માસમાં એક પંજાબી યુવકે વાયોર પોલીસ મથકે ફરિયાદ નોંધાવેલી.આ પંજાબી યુવાને ચાર વર્ષ અગાઉ વાઘાપધ્ધરમાં આવેલી ફરિયાદીની કાર્બન પાઉડરની ફેક્ટરી ભાડેથી મેળવેલી.

ત્યારબાદ ફેક્ટરીમાં તૈયાર પડેલો માલ ચોરી કરી વેચી નાખ્યો હોવાની અને સમાધાન પેટે ચાર લાખ આપવા છતાં ફરિયાદીએ ફેક્ટરી ચાલુ ના કરવા દઈ માણસોને મારવાની ધમકી આપી હોવાની પંજાબી યુવકે ગત મે માસમાં વાયોર પોલીસ મથકે ફરિયાદ નોંધાવેલી. ACBના સૂત્રોએ જણાવ્યું કે તે સમયે ફરિયાદીને માર ના મારવા પેટે ઈન્દુભાએ બે લાખ રૂપિયા માગેલાં. જે પૈકી રકઝકના અંતે એક લાખ રૂપિયા લઈને માની ગયેલો.

ફરિયાદી ફેક્ટરી શરૂ કરવા ઈચ્છતો હતો પરંતુ ઈન્દુભાએ મે માસમાં તેની સામે દાખલ થયેલા ગુનાની આડમાં હેરાન પરેશાન કરવાની ધમકી આપીને ફેક્ટરી ચાલુ કરવા માટે માસિક ૫૦ હજારનો હપ્તો આપવો પડશે તેમ જણાવેલું. તેની ધાક-ધમકી અને વારંવાર લાંચની માંગણીથી કંટાળીને ફરિયાદીએ ACBના ટોલ ફ્રી નંબર ૧૦૬૪ પર જાણ કરીને, ગાંધીધામ ACB પોલીસ મથકે ફરિયાદ આપી હતી.

ACBએ ફરિયાદી સાથે મળીને ઈન્દુભાને રંગેહાથ પકડવા ટ્રેપ ગોઠવી હતી. ભુજમાં રહેતા ઈન્દુભાએ ગત રાત્રે દસ વાગ્યાના અરસામાં ફરિયાદીને ભુજના તેના નિવાસસ્થાન નજીક આવેલા ગાયત્રી મંદિર પાસે રૂપિયા લઈને બોલાવ્યો હતો. ઈન્દુભા સિલેરીયો કાર લઈને ફરિયાદી પાસે આવ્યો હતો. તેણે ઈશારો કરીને ફરિયાદીને પોતાની કારમાં બેસાડ્યો હતો.

નાણાંની લેતી-દેતી વખતે સતર્ક ઈન્દુભાને ગંધ આવી જતાં તે ફરિયાદીને કારમાંથી ઉતારી રફૂચક્કર થઈ ગયો હતો.

થોડાંક વર્ષો અગાઉ મોડ-2ની પરીક્ષા  પાસ કરી PSI તરીકે પ્રમોશન મેળવી છેલ્લાં ત્રણ ચાર વર્ષથી વાયોરમાં ફરજ બજાવે છે.

ACB બોર્ડર એકમના મદદનીશ નિયામક કે.એચ. ગોહિલ અને રાજકોટસ્થિત ઈન્ચાર્જ નાયબ નિયામક બલદેવસિંહ વાઘેલાના માર્ગદર્શનમાં ગાંધીધામ ACB પોલીસ ઈન્સ્પેક્ટર જે.બી. ચૌધરી અને તેમની ટીમે ગત રાત્રે ભુજમાં ટ્રેપ ગોઠવી હતી.