માધાપરની ભવાની હોટેલ પાછળ આવેલા રેલવે ટ્રેક પરથી રવિવારે સાંજે ૨૬ પરિણીતા અંજલિદેવી ઠાકુર અઢી વર્ષના બાળકને લઈને પસાર થતી હતી ત્યારે સામેથી પગપાળા આવેલા બે યુવકો તેના ગળામાં રહેલું વીસ હજારનું મંગળસૂત્ર ખેંચી, લૂંટીને ભુજોડી તરફ નાસી છૂટ્યાં હતાં.

બે યુવકો મંગળસૂત્ર વેચવાની ફિરાકમાં હોવાની બાતમીના આધારે માધાપરના સોનાપુરી ગેટ પાસેથી પોલીસે તેમને પકડી લીધા છે. ઝડપાયેલાં યુવકોમાં નરેન્દ્ર ઊર્ફે નવીન લાલાભાઈ સુમાર મારવાડા (ઉ.વ. ૧૯) અને જાસીન ઊર્ફે જાસ્લો ઈશાકઅલી નોડે (ઉ.વ. ૨૦. બંને રહે. સુમરાવાંઢ, ભવાની હોટેલ પાછળ, મધર ડેરી નજીક, માધાપર)નો સમાવેશ થાય છે. બેઉ પાસેથી પોલીસે વીસ હજારનું મંગળસૂત્ર રીકવર કરી લીધું છે.

ગત ૮મી જૂનની સાંજે પોણા છના અરસામાં માધાપરના ભીમાસર વિસ્તારમાં ઘર બહાર સગા સંબંધીઓ જોડે ઊભીને વાતો કરતી NRI મહિલા મંજુલાબેન વરસાણીના ગળામાંથી ૩ તોલાની દોઢ લાખની સોનાની ચેઈન ખેંચીને બે બાઈકસવાર યુવકો ગંગેશ્વર રોડ તરફ નાસી છૂટ્યાં હતાં. માધાપર નવા વાસ ગ્રામ પંચાયતે ગામમાં તમામ એન્ટ્રી અને એક્ઝિટ પોઈન્ટ સહિત ૪૫ જેટલી જગ્યાએ સીસીટીવી કેમેરા લગાડેલાં છે. આ કેમેરામાં બંને ચેઈન સ્નેચરોના ફૂટેજ કેપ્ચર થઈ ગયાં છે.

ગુનો બન્યાની ગણતરીની મિનિટોમાં તેમણે પહેરેલાં કપડાં બદલી નાખ્યાં હતાં. જે બાઈક પર તેઓ ફરતાં હતા તે બાઈક ભુજના રેલવે સ્ટેશન વિસ્તારમાંથી મળ્યું હતું અને તે અંજારમાંથી ચોરાયેલું હોવાની શક્યતા છે. જો કોઈ આ બેઉ સ્નેચરોને ઓળખતાં હોય તો પોલીસને જાણ કરવા તેમણે અનુરોધ કર્યો છે.