ચેકીંગ દરમિયાન એક કાળા કાચવાળી અને આગળ પાછળ નંબર પ્લેટ વગરની થાર જીપ પસાર થતાં તેને અટકાવી હતી. થારના ચાલકને આ અંગે પૂછપરછ કરતાં તે જીભાજોડી પર ઉતરી આવ્યો હતો અને ફોન કરી અન્ય કોઈકને સ્થળ પર બોલાવ્યો હતો.

આ સમયે ઉશ્કેરાઈને સ્કોર્પિયોમાં આવેલા પિતા પુત્ર પૈકીના પિતાએ બેઉ પોલીસ કર્મીઓ જોડે હાથાપાઈ કરતા બંને કર્મચારીઓને હાથ અને મોંઢે ઈજા થયેલી. જેના પગલે બેઉ જણને સાથી કર્મચારી લાલજી પરમાર જી.કે. જનરલ હોસ્પિટલમાં સારવાર માટે લઈ આવ્યો હતો. આ મામલે જી.કે. જનરલની હોસ્પિટલ ચોકીએ વિધિવત્ એમએલસી પણ નોંધાવાઈ હતી.

ઘટના બાદ બંને પક્ષે દોડધામ મચી ગઈ હતી. સૂત્રોના દાવા મુજબ આ મામલે ભલામણો આવતાં ઘાયલ પોલીસ કર્મચારીઓએ સામેના પક્ષ સાથે ગણતરીના કલાકોમાં સમાધાન કરી લીધું છે. માધાપરના મહિલા પીઆઈ એ.કે. જાડેજાએ જણાવ્યું કે સામાન્ય બોલાચાલી અને તકરાર થયેલી. પાછળથી ઓળખાણ નીકળતાં પોલીસ કર્મચારીઓએ ફરિયાદ નોંધાવવાનું ટાળી દીધું છે. ફરિયાદ નોંધાવવી કે નહીં તે પોલીસ કર્મચારીઓના અધિકારની બાબત છે, અમે તેમને ફરિયાદ નોંધાવવા માટે ફોર્સ કરી શકીએ નહીં.

પોલીસ કર્મચારી એ રાજ્ય સેવક છે. જ્યારે તે સરકારી ફરજ પર હોય, નિયમભંગ કરીને જઈ રહેલું વાહન પકડે, તેમના પર હુમલો થાય અને પછી વાહનચાલક અને મારકૂટ કરનારાં સામે ભેદી રીતે કશી જ કાર્યવાહી કર્યાં વગર બારોબાર સમાધાન કરી લેવાય તે બાબત ગંભીર છે. જો પોલીસ કર્મચારી ફરિયાદ નોંધાવવા તૈયાર ના હોય તો થાણા અધિકારીએ આવા કોગ્નિઝેબલ ઓફેન્સમાં જાતે ફરિયાદી બની સરકાર તરફે ફરિયાદ દાખલ કરાવવી જોઈએ તેવું જાણકારોનું માનવું છે.