ફરિયાદી ગત રાત્રે દુકાન વધાવીને આખા દિવસના વકરાને બેગમાં લઈ બાઈક પર ઘરે જવા નીકળ્યો હતો. આરટીઓ સર્કલ પાસે ખોદાયેલાં રોડના કારણે બાઈક ધીમું કરેલું. તે સમયે અચાનક પાછળથી પલ્સર બાઈક પર બુકાની ધારણ કરીને આવેલા બે યુવકો પૈકી બાઈક પાછળ બેઠેલાં યુવકે તેને ચાલું વાહને લાત મારતાં તે બાઈક સમેત નીચે પટકાયો હતો.

જો કે, અરુણે રાડારાડ કરીને બેઉ હાથ વડે બેગને મજબૂતીથી પકડી રાખેલી. દરમિયાન, કોઈ વાહનની હેડલાઈટનો શેરડો પડતાં બેઉ જણ તેને પડતો મૂકીને બાઈક પર નાસી ગયેલાં. હેડલાઈટના પ્રકાશમાં અરુણે પલ્સર બાઈકનો નંબર વાંચી લીધો હતો.

ઘટના બાદ લોકો ત્યાં દોડી આવેલાં. બાઈક પરથી પડી જવાથી વાગ્યું હોય તેને જી.કે. જનરલમાં લઈ જવાયેલો. આજે બપોરે તેણે બનાવ અંગે ભુજ બી ડિવિઝનમાં પોલીસ ફરિયાદ નોંધાવેલી. બાઈકના નંબરના આધારે GJ-12 HC-5045 નંબરની બાઈક પર સવાર રજબઅલી બરકતઅલી પઠાણ અને સમીર અલીમામદ કકલ (બેઉ રહે. ભૂતેશ્વર, ભીડ નાકા બહાર, ભુજ)ને ઝડપી લેવાયાં છે.