ત્રીજો પરિણીત પુત્ર પરિવાર સાથે સામત્રામાં સ્વતંત્ર રહે છે. ધનજીભાઈના પત્નીનું ચાર વર્ષ અગાઉ નિધન થયેલું. તેઓ એકલવાયું જીવન જીવતાં હતા. દોઢ વર્ષ અગાઉ ધનજીભાઈએ મહેસાણાના હીરપુરા ગામની કૈલાસ કનુસિંહ ચૌહાણ નામની મહિલા સાથે બીજા લગ્ન કરેલાં. કૈલાસના પણ પતિ જોડે છૂટાછેડાં થયેલાં છે.

કૈલાસે ધનજીભાઈને જોઈને નહીં પરંતુ જાણે તેમનું ધન જોઈને લગ્ન કર્યાં હોય તેમ લગ્ન કરીને ઘરમાં રહેવા આવ્યા બાદ ધનજીભાઈની પ્રથમ પત્નીના અંદાજે ૧૮ તોલા સોનાના મંગળસૂત્ર, પાટલા, કંઠી, વીંટી વગેરે જેવા ઘરેણાં પોતાની પાસે લઈ લીધેલા અને ધનજીભાઈને પાછાં આપતી નહોતી. ધનજીભાઈ ઘરેણાં માગે તો ઝઘડા કરતી હતી.

ધનજીભાઈ રૂપિયા આપવાની ના પાડે તો મારી નાખવાની ધમકીઓ આપતી. તેના આ ત્રાસ અંગે ધનજીભાઈએ ગામમાં રહેતા પુત્ર કપિલ અને અન્ય સામાજિક આગેવાનોને પણ રજૂઆત કરેલી.

ગઈકાલે શનિવારે સાંજે પાંચ વાગ્યાના અરસામાં કૈલાસે વધુ એકવાર ધનજીભાઈ પાસે રૂપિયાની માંગણી કરેલી. ધનજીભાઈએ ઈન્કાર કરતાં ઉશ્કેરાઈને ‘આજે તો તને જીવતો નહીં મૂકું’ કહીને કૈલાસ પતિને હાથ ખેંચીને આંગણાની બાજુમાં આવેલા ગેરેજમાં લઈ ગઈ હતી. ગેરેજમાં રાખેલી કેરોસીનની બોટલ ખોલીને કેરોસીન ધનજીભાઈ પર છાંટ્યું હતું. ત્યારબાદ દિવાસળી પેટાવીને ધનજીભાઈ પર ફેંકતા જ તે ભડભડ બળવા માંડ્યા હતા.

ગંભીર રીતે દાઝી ગયેલાં ધનજીભાઈ બૂમો પાડતાં પાડતાં ફસડાઈ પડ્યાં હતા. થોડીકવાર બાદ જાણ થતાં તેમનો પુત્ર કપિલ અને અન્ય લોકો દોડી આવ્યાં હતા. એમ્બ્યુલન્સ બોલાવી ધનજીભાઈને સારવાર માટે જી.કે. જનરલ હોસ્પિટલ લઈ આવ્યાં હતા.

તબીબોએ પોલીસને જણાવ્યું છે કે ધનજીભાઈ અંદાજે નેવું ટકા જેટલું દાઝી ગયાં છે. પોલીસે રાત્રે તેમના નિવેદનના આધારે કૈલાસ સામે ફરિયાદ દાખલ કરી છે. સૂત્રોમાંથી મળતી માહિતી મુજબ કૈલાસને દબોચી લેવાઈ છે. બનાવની તપાસ માનકૂવાના ઈન્ચાર્જ પીઆઈ પી.પી. ગોહિલ કરી રહ્યા છે.