ફરિયાદમાં કોમલે જણાવ્યું કે જૂનાગઢ રહેતા તેના ભાઈને અગરબત્તીના જથ્થાબંધ વેપારમાં નાણાંની જરૂરત ઊભી થયેલી. ફરિયાદી કિટ્ટી પાર્ટીમાં જતી હોઈ મિરજાપરના મહાદેવનગરમાં રહેતી ટીના જણસારી સાથે તેનો પરિચય થયેલો. ટીનાને વાત કરતાં તેણે વ્યાજે રૂપિયા આપેલાં. કોમલે ટીના પાસેથી ૨૦૨૩થી ટુકડે ટુકડે અલગ અલગ વ્યાજદરે પચાસ પચાસ હજાર લેખે કુલ ૫.૫૦ લાખ મેળવેલાં. બદલામાં ટીનાને વ્યાજ પેટે ૯.૪૬ લાખ રૂપિયા ચૂકવી આપેલાં. ટીનાએ સ્યોરીટી માટે કોમલ પાસેથી સહી કરેલાં ત્રણ કોરાં ચેક અને સોનાની ચેઈન, કાનની બુટ્ટી લઈ લીધા હતા.

વ્યાજનું વિષચક્ર પૂરું ના થતાં કોમલે પ્રમુખ સ્વામી નગરમાં રહેતી જિજ્ઞા ઠક્કર પાસેથી ટુકડે ટુકડે ૧૦ લાખ રૂપિયા મેળવેલાં. તેની સામે વ્યાજ પેટે ૧૫.૬૫ લાખ રૂપિયા ચૂકવી આપ્યાં છે. તો, પ્રમુખ સ્વામી નગરની નીતા ગજરા પાસેથી મેળવેલા દોઢ લાખ સામે અઢી લાખ રૂપિયા ચૂકવી આપ્યાં છે.

ભાઈના ધંધા માટે ત્રણ બહેનપણીઓ પાસેથી ટુકડે ટુકડે અલગ વ્યાજ દર અને સમયે ૧૭ લાખ રૂપિયા સામે વ્યાજ પેટે ૨૭.૬૧ લાખ ચૂકવી દીધા છતાં વ્યાજનું વિષચક્ર ચાલુ રહેતા કંટાળીને કોમલે મરવા માટે પણ પ્રયાસ કરેલો. પોલીસે ત્રણે બેનપણીઓ સામે ગુનો નોંધી તપાસ શરૂ કરી છે.