ગાંધીધામની નવી સુંદરપુરીમાં રહેતા ૨૩ વર્ષિય સુનિલ પ્રહ્લાદભાઈ પ્રજાપતિ નામના યુવકે ટેલિગ્રામ પર આવેલી લિન્ક મારફતે સાયબર ચીટરોની જાળમાં ફસાઈને ૭.૫૯ લાખ રૂપિયા ગુમાવ્યાં છે. સાયબર ક્રિમિનલોએ ટેલિગ્રામ પર તેને લિન્ક મોકલીને રીલ્સને લાઈક કરવાનું ટાસ્ક આપેલું. એક રીલ્સને લાઈક કરવા બદલ તેને ૬૦ રૂપિયા મળવાનું જણાવેલું. બાદમાં વધુ ને વધુ ટાસ્ક મેળવવા નાણાંનું રોકાણ કરવા અને રોકાણ સામે ૨૦થી ૪૦ ટકા પ્રોફિટ મળવાની લાલચ આપીને તેની પાસે ૭.૫૯ લાખ રૂપિયાનું રોકાણ કરાવ્યું હતું.

સુનિલની જેમ લાકડીયા નજીક આવેલી એક કંપનીમાં સુપરવાઈઝર તરીકે નોકરી કરતા રવિ મનુભાઈ દરજી નામના યુવકે ટેલિગ્રામ પર આવેલી લિન્ક મારફતે સાયબર ચીટરોની જાળમાં ફસાઈને ૨.૪૭ લાખ રૂપિયા ગુમાવ્યાં છે. ચીટરોએ તેને અલગ અલગ ટાસ્ક આપેલાં. વધુ ટાસ્ક મેળવવા માટે રોકાણ કરવા જણાવતાં હતાં. તેમની વાતોમાં આવી જઈને રવિએ ૨૧-૦૫-૨૦૨૫ના રોજ એક જ દિવસે ટૂકડે ટૂકડે  ૨.૪૭ લાખ રુપિયા જમા કરાવ્યાં હતાં. બાદમાં નાણાં વિડ્રૉઅલ કરવા જતા વધુ રુપિયા મગાયેલાં.

શેર માર્કેટમાં ઓનલાઈન ટ્રેડિંગ કરવાના બહાને લોકોને ઠગતાં સાયબર ક્રિમિનલ્સને આવી ઓનલાઈન ટ્રેડિંગ માટેની વિવિધ વેબસાઈટ અને મોબાઈલ એપ ડેવલોપ કરી આપતા ભુજના બે યુવકોની સાયબર ક્રાઈમ પોલીસે ધરપકડ કરી છે. બાતમીના આધારે પોલીસે શહેરના ત્રિમંદિર નજીક સરદાર પટેલનગરમાં રહેતા વિષ્ણુ રાજેશભાઈ ચૌહાણના રહેણાકમાં દરોડો પાડીને તેને તેના સાગરીત નિપુણ કિશોરભાઈ ઠક્કર (રહે. કૈલાસનગર, ભુજ) જોડે રંગેહાથ ઝડપી પાડ્યો હતો.

જો કે, તેના લેપટોપની તપાસ કરતાં તેમાંથી જુદા જુદાં નામની ૧૬ વેબસાઈટ્સ અને એપની માહિતી મળી હતી. આ એપ્સ અને વેબસાઈટ તે દુબઈસ્થિત લોકોને મોકલતો હતો. એટલું જ નહીં, તેના ફોનમાંથી વિવિધ ક્લાયન્ટ્સના હિસાબોની એક્સેલ શીટ મળી આવી હતી. વિષ્ણુની લેપટોપ બેગમાંથી એપ્સના વેચાણમાંથી ઉપજેલા ૪૯ હજાર ૫૦૦ રોકડાં રૂપિયા મળી આવ્યા છે.

પોલીસે અંગત આર્થિક ફાયદો મેળવવા ગુનાહિત કાવતરું રચીને ગેરકાયદે રીતે શેર માર્કેટ ટ્રેડિંગની એપ વેબસાઈટ ડેવલપ કરી દુબઈ મોકલી આર્થિક લાભ મેળવવા સબબની કલમો તળે ગુનો દાખલ કર્યો છે.