૨૦૧૮થી ઈકરામ બાફણ સાથે પ્રેમ સંબંધમાં રહેલી મિત્તલ મહેશ્વરી નામની યુવતીએ જણાવ્યું કે લગ્ન કર્યા બાદ પણ મેં ધર્મ પરિવર્તન કર્યું નથી.

એકાદ માસ અગાઉ મિત્તલ અને ઈકરામ પ્રેમ લગ્ન કરવાના હેતુથી કચ્છથી મુંબઈ ભાગી ગયેલાં. ત્યાં તેમણે સ્વેચ્છાએ લગ્ન કરેલાં. એસસી એસટી સેલના નાયબ પોલીસ અધીક્ષક એમ.જે. ક્રિશ્ચિયને જણાવ્યું કે તેમના લગ્નના પ્રમાણપત્ર અંગે કેટલાંક લોકોએ શંકા દર્શાવીને તે બોગસ હોવાનું જણાવેલું પરંતુ ખુદ ગુજરાત હાઈકૉર્ટના જસ્ટિસે બારકોડના આધારે લગ્નના પ્રમાણપત્રની ખરાઈ કરી તે સાચું હોવાનું જણાવી બંનેને પોલીસ રક્ષણ આપવા હુકમ કર્યો હતો.

ગઈકાલે ભુજમાં રેલી યોજીને મિત્તલના આ પ્રેમ લગ્નને તથાકથિત ‘લવ જેહાદ’ના બનાવમાં ખપાવવા પ્રયાસ કરાયેલો. રેલીમાં ભાજપ અને હિંદુ સંસ્થાના આગેવાનો પણ જોડાયા હતા. મિત્તલ તે સમયે ભુજમાં પોલીસ રક્ષણ હેઠળ કલેક્ટર કચેરીથી અડધો કિલોમીટર દૂર પોલીસ કચેરીમાં હાજર હતી.

પોલીસ અને મિત્તલના બયાનોએ વાસ્તવિક હકીકત સ્પષ્ટ કરી દીધી છે. મિત્તલે કહ્યું કે હવે તે કચ્છમાં રહેવા ઈચ્છતી નથી. પોલીસે પણ ભારપૂર્વક જણાવ્યું છે કે મિત્તલ પુખ્ત છે. તે જ્યાં અને જેની સાથે રહેવા ઈચ્છતી હોય તે મુક્ત છે અને તે જ્યાં જાય ત્યાં પોલીસનું રક્ષણ મળતું રહેશે.