ફરિયાદી દીપક જોશી માધાપરની ગોકુલધામ-1 સોસાયટીમાં બીજું મોટું મકાન ધરાવે છે. આ મકાન તે ઘણાં સમયથી વેચવા ઈચ્છતા હતા. તો, તેમના વેવાઈ કિરતાર ભટ્ટને વળી જમીનમાં રૂપિયા ઈન્વેસ્ટ કરવામાં રસ હતો અને તેમણે ફરિયાદીને સસ્તામાં સારી જમીન હોય તો જાણ કરવા વિનંતી કરેલી.

દરમિયાન, તેમને અજાણ્યા નંબર પરથી ગની બાફણનો ફોન આવેલો અને ભુજના વાડાસર ગામે આવેલા એક ખેતરનો સસ્તામાં સોદો થાય તેમ હોવાનું જણાવેલું. ગનીની વાતો પર વિશ્વાસ કરીને ફરિયાદી જમાઈને લઈ ગની જોડે વાડાસર ગામે ૬ એકરની પિયત જમીન જોવા ગયેલાં.

ખેતર પસંદ આવી જતા સોદા અંગે વાતચીત કરવા માટે  ગનીએ ફરિયાદી અને તેમના જમાઈની દામજી પટેલ જોડે બેઠક કરાવેલી. ખેતર દામજીની પત્ની શાંતાબેનના નામે છે. ફરિયાદીએ પોતાનું માધાપરમાં આવેલું મકાન ૩૧.૫૦ લાખમાં વેચવા કાઢ્યું હોવાનું અને તે વેચાઈ ગયા બાદ જમીનનો સોદો ફાઈનલ કરશે તેમ જણાવેલું.

ફરિયાદીએ સંમતિ દર્શાવીને સપ્ટેમ્બર ૨૦૨૪માં ટોકન પેટે ૫૧ હજાર રૂપિયા આપેલાં. ત્યારબાદ, ખેતરના સાટા કરાર કરાવતી વખતે વધુ પાંચ લાખ આપેલાં.

માર્ચ ૨૦૨૫માં ગની સૂરજસિંઘ નામના શખ્સને લઈને આવેલો અને અગાઉ થયેલી વાતચીત મુજબ ફરિયાદીએ સૂરજસિંઘના નામે માધાપરના મકાનનો દસ્તાવેજ લખી આપ્યો હતો.  

મકાનનો દસ્તાવેજ થઈ ગયા બાદ ફરિયાદીએ દામજીને વાડાસરના ખેતરનો સોદો પૂરો કરવા માટે જણાવતાં દામજી ફરી ગયો હતો. ‘તમે કોને પૂછીને તમારા મકાનનો દસ્તાવેજ સૂરજસિંઘના નામે કરાવ્યો? મને કોઈ વાતની ખબર નથી’ કહીને ખેતરનો સોદો કરવાનો ઈન્કાર કરી દીધો હતો. ફરિયાદીએ ગનીને આ મુદ્દે વાત કરતાં ગનીએ તેમને ટેન્શન ના લેવા જણાવીને થોડાં દિવસો પછી જમીનનો દસ્તાવેજ કરાવી આપવાની ખાતરી આપેલી.

થોડાં દિવસો પછી ગની ફરિયાદીને મળવા આવેલો અને મકાનના વેચાણના રૂપિયાના બદલામાં ૧૧.૫૦ લાખ અને ૨૦ લાખ રૂપિયાની રકમ લખેલા બે ચેક આપ્યા હતા. જો કે, બંને ચેક રિટર્ન થયેલાં. ગનીના કહેવાથી ફરી વખત રિટર્ન થયેલા ચેક બેન્કમાં નાખેલા અને બીજી વખત પણ બેઉ ચેક બાઉન્સ થયેલાં.

આમ, ૪૬ લાખનું ખેતર ખરીદવા જતા દીપકભાઈને માધાપરની ગોકુલધામ સોસાયટીમાં આવેલું ૩૧.૫૦ લાખનું મકાન અને ખેતરની સુથી તથા સાટા કરાર વખતે દામજીને આપેલા ૫.૫૧ લાખ રૂપિયા ગુમાવવાનો વારો આવ્યો છે.