પોલીસે સ્થળ પરથી પકડેલાં ખેલીઓમાં ભીમજીભાઈ વાલજીભાઈ વાણિયા (સોરઠીયા) (રહે. સેક્ટર- ૪, આદિપુર), જુસબશા જમનશા શેખ (અંજાર), ધનજીભાઈ પબુભાઈ ગોલકર (રહે. પીપરાળા, સાંતલપુર), મહેબુબ સત્તાર બાયડ (રહે. ભુજ), મુરાદ અલ્લારખા મીર (રહે. લાકડીયા), મોહન કરસનજી રાજગોર (ભુજ) જુસબ ઈબ્રાહિમ સમેજા (રહે. અંજાર)નો સમાવેશ થાય છે.

અંજારના અબ્બાસ ઈબ્રાહિમ શેખ અને જુસબશા જમનશા શેખ તથા ભુજના સરપટ નાકા નજીક આશાપુરાનગરમાં રહેતા મનીષ હરિલાલ રાજગોરે  લાંબા સમયથી અહીં ક્લબ શરૂ કરેલી. દરોડા સમયે જુસબશા પકડાઈ ગયો હતો પરંતુ અબ્બાસ અને મનીષ સ્થળ પર હાજર મળ્યાં નહોતા.

પોલીસે જુસબશા સાથે અબ્બાસ અને મનીષના નામ પણ ક્લબ સંચાલક તરીકે ફરિયાદમાં દાખલ કર્યાં છે. 

ભુજનો મનીષ હરિલાલ રાજગોર ૧૮-૦૮-૨૦૧૯ના રોજ ભુજની ભાગોળે નાગોર ગામની સીમમાં ચાલતી જુગાર ક્લબના સંચાલક તરીકે પણ પોલીસ ચોપડે ચઢી ચૂકેલો છે. તત્કાલિન DySP જે.એન. પંચાલે આ ક્લબ પર રેઈડ કરીને ૨.૫૬ લાખ રોકડાં, ૮ દ્વિચક્રી વાહનો, મોબાઈલ વગેરે મળી ૫.૬૯ લાખના મુદ્દામાલ સાથે ૮ ખેલીની અટક કરેલી. ક્લબ સંચાલક મનીષ રાજગોર ત્યારે પણ નાસી છૂટ્યો હતો.

મનીષ સામે ભુજ એ અને બી ડિવિઝનમાં મારામારી, રાયોટીંગની ઘણી ફરિયાદો નોંધાયેલી છે.

પોલીસે જુગાર રમતાં પકડેલો આદિપુરનો ૬૧ વર્ષિય ભીમજી વાલજીભાઈ વાણિયા (સોરઠીયા) ગત ૨૭ મેના રોજ અંજારના સિનુગ્રામાં પોતાના ફાર્મ હાઉસમાં જુગાર ક્લબ ચલાવતા રંગેહાથ પકડાયેલો. અંજાર પોલીસે જે ૧૧ ખેલી પકડેલાં તેમાંનો એક જુસબશા શેખ પણ હતો.

દરોડામાં ઝડપાયેલો ખેલી મુરાદ અલ્લારખા મીર (કારાણી) પણ અઠંગ ખેલી અને ક્લબ સંચાલક છે.

એ જ રીતે, ૦૫-૧૦-૨૦૨૫ના રોજ SMCએ પધ્ધર પોલીસ સ્ટેશનની હદમાં કોંગ્રેસની પૂર્વ નેતા સલમા ગંઢ અને મોટા રેહાના લિસ્ટેડ બૂટલેગર ગુલાબસિંહ જાડેજા સંચાલિત કોટડા (ચકાર) ગામની સીમમાં જુગાર ક્લબ પર દરોડો પાડેલો તે વખતે પણ મુરાદ રંગેહાથ પકડાઈ ગયેલો.  

ગાંધીનગરથી આવેલી વિજિલન્સની રેઈડના પગલે માનકૂવા પોલીસની નિષ્ક્રિયતા અને ઘોર બેદરકારી બહાર આવી છે. સ્થાનિક બીટ જમાદારથી લઈ પીઆઈ સુધીના સ્ટાફની જાણ વગર આ રીતે લાંબા સમયથી જુગાર ક્લબ ધમધમતી રહે તે કોઈને ગળે ઉતરતું નથી. SMC રેઈડના પગલે રેન્જ આઈજી ચિરાગ કોરડીયા ચોંકી ઉઠ્યાં છે. ત્યારે, આ રેઈડના પગલે માનકૂવા પોલીસ સ્ટેશનના જવાબદારો સામે કડક એક્શન લેવાય તેવી સંભાવના છે.