દરોડા સમયે એકેય મુખ્ય આરોપી સ્થળ પર હાજર મળ્યો નહોતો.

સ્થળ પરથી SMCએ ૧.૭૮ લાખનું ચોરાઉ ઓઈલ, ૨ કરોડ ૮૧ લાખ ૫૦ હજારના મૂલ્યનું ઓઈલ ભરેલાં ૧.૫૦ કરોડની કિંમતના ૬ ટેન્કર, મોબાઈલ ફોન, પ્લાસ્ટિકના બેરલો, કેરબા, બકેટ, વજનકાંટો, ઓઈલ ચોરવા માટે વપરાતી ઈલેક્ટ્રિક મોટર વગેરે મળીને કુલ ૪ કરોડ ૩૪ લાખ ૫૨ હજારનો મુદ્દામાલ જપ્ત કરીને પ્રાગપર પોલીસ મથકે ફરિયાદ નોંધાવી છે.

ગફૂર અને ધૃવ જેઠવા કોમોડિટી ચોરીના ગુનામાં અગાઉ મુંદરા પોલીસના ચોપડે ચઢી ચૂકેલાં છે. મુંદરા પોર્ટથી વિદેશ મોકલાઈ રહેલાં કન્ટેઈનરના ડ્રાઈવરને ફોડીને, ભોરારાની હોટલ પાછળ કન્ટેઈનર લઈ જઈ ૪૫ લાખનું ઈસબગુલ અને તલ ચોરી લેવાના બનાવમાં ૨૦-૦૮-૨૦૨૫ના રોજ મુંદરા પોલીસ મથકે ગફૂર અને ધૃવ સહિતના લોકો સામે નામજોગ ફરિયાદ નોંધાઈ હતી. ત્યારબાદ અન્ય લોકોએ પણ આ બેઉ સહિતની ગેંગ પર બીજા ગુના દાખલ કરાવેલાં. તો, હરભમ રબારી પણ અગાઉ ૨૮-૧૧-૨૦૨૪ના રોજ અંજાર પોલીસે શોધેલાં ઓઈલ ચોરીના ગુનામાં પોલીસ ચોપડે ચઢી ચૂકેલો છે. રેઈડ કરનાર પીઆઈ એસ.એમ. જાડેજાએ જણાવ્યું કે પાંચે સૂત્રધારો પર કોમોડિટી ચોરીને લગતાં આવા અન્ય ઘણાં ગુના નોંધાયેલાં છે.