પકડાયેલાં બૂટલેગરે પોતાના ઘરે પણ ઈંગ્લિશ દારૂનો જથ્થો પડ્યો હોવાનું કબૂલતાં પોલીસે રહેણાકમાંથી ૨૧.૨૦ લાખનો વિવિધ બ્રાન્ડનો શરાબ જપ્ત કર્યો હતો.

અબડાસાના ખાનાયનો લિસ્ટેડ બૂટલેગર રાસુભા તગજી સોઢા અને મુંદરાના બરાયા ગામે રહેતો બળવંત ઊર્ફે બળુભા કિરીટસિંહ જાડેજા (ઉ.વ. ૩૨, મૂળ કેશવમ રેસિડેન્સી, ગુંદાલા, મુંદરા) બેઉ હેરિયર કારમાં દારૂ ભરીને બળવંતના ઘર તરફ જતાં હોવાની પોલીસને બાતમી મળેલી. પોલીસે વૉચ ગોઠવી હેરિયરને અટકાવવા પ્રયાસ કરેલો.

કારમાંથી પોલીસે ૧ લાખનો બિયરનો જથ્થો જપ્ત કરેલો. પ્રાથમિક પૂછપરછમાં બળવંતે આ જ રીતે ખેપ મારીને ઈંગ્લિશ દારૂનો જથ્થો લાવી ઘરમાં રાખ્યો હોવાનું કબૂલતાં પોલીસે બરાયા ગામે આવેલા તેના ડેલીબંધ મકાનમાં દરોડો પાડીને વિવિધ બ્રાન્ડનો ૨૧.૨૦ લાખનો ઈંગ્લિશ શરાબ જપ્ત કર્યો હતો. તે સમયે માલની દેખરેખ અને કટિંગ માટે ઘરમાં હાજર રાસુડાનો માણસ અજીત પ્રેમસિંહ સોઢા (ઉ.વ. ૨૪, રહે. ખાનાય) પોલીસના હાથે ઝડપાઈ ગયો હતો.

માલના કટિંગ માટે ઘર બહાર બે સ્કોર્પિયો કાર પાર્ક કરી રાખેલી હતી. જેમાંની એક GJ-12 FH-8123 નંબરની કાર બળવંતના કાકા મનુભાની માલિકીની હોવાનું બહાર આવ્યું છે. LCBએ શરાબ ઉપરાંત ૪૫ લાખની ત્રણે કાર, ૪૦ હજારના ચાર મોબાઈલ ફોન મળી કુલ ૬૭.૬૨ લાખનો મુદ્દામાલ જપ્ત કરીને ત્રણે સામે પ્રાગપર પોલીસ મથકે સરકાર તરફે ફરિયાદ નોંધાવી છે.

LCBએ જેને એક લાખના બિયર ટીન સાથે પકડ્યો તે બળવંત પોપટની જેમ બોલી ગયેલો કે ‘સાહેબો, હજુ મારા ઘરમાં ઈંગ્લિશ દારૂનો મોટો જથ્થો પડ્યો છે. આ દારૂ અમે લોકો બે સ્કોર્પિયો કારમાં છૂટક બૂટલેગરોને સપ્લાય કરવાના હતા’ પરંતુ, બિયર અને વ્હિસ્કીનો જથ્થો હેરિયર કારમાં ક્યાંથી અને કોની પાસેથી બરાયા ખાતે લઈ આવેલાં કેવળ તે જ વિગત પોલીસને ના જણાવી!

ગઈકાલે દેવા ગઢવીનો જે માલ પકડાયેલો તે પણ પંજાબની ડિસ્ટલરીઝનો હતો.