SMCની રેઈડના પગલે માનકૂવાના પોલીસ ઈન્સ્પેક્ટર એસ.એમ. રાણા અને પીએસઆઈ એચ.એમ. બ્રહ્મભટ્ટને પોલીસ હેડક્વાર્ટરમાં ટ્રાન્સફર કરી દેવાયાં છે. પોલીસ સૂત્રોનું માનીએ તો ખરેખર તો બેઉ જણ પરથી ‘સૂળીનો ઘા સોય’થી સર્યો છે. કારણ કે, એક માસ અગાઉ માંડવી મરિન પોલીસ મથકની હદના ત્રગડી ગામે SMCએ રેઈડ કરી તે સાંજે જ એસપીએ માંડવી મરિનના પીઆઈ ડી.એન. વસાવા અને બીટ જમાદાર પ્રદ્યુમ્નસિંહ જાડેજાને સસ્પેન્ડ કર્યાં હતાં જ્યારે લોકલ ક્રાઈમ બ્રાન્ચના પીઆઈ એસ.એમ. ચુડાસમાની હેડ ક્વાર્ટરમાં મૂક્યાં હતા.

SMCની રેઈડના પગલે તાબાના પોલીસ અધિકારીઓ અને કર્મચારીઓ સામે એસઓપી મુજબ પગલાં લેવાય છે પરંતુ આવા બનાવોમાં ખુદ SP કે DySP જેવા અધિકારીઓની જવાબદારી ભાગ્યે જ ફિક્સ થાય છે. આ અધિકારીઓની જવાબદારી લૉ એન્ડ ઓર્ડરના મોનિટરીંગ તથા ક્રાઈમ પ્રિવેન્શનની છે. વક્રતા એ છે કે આ SP કે DySP જેવા અધિકારીઓની જવાબદારી યા બેજવાબદારી નિયત કરવાની જેના માથે જવાબદારી છે તે ગુજરાતના પોલીસ વડાને પણ કદાચ પોતાની જવાબદારી શું છે તેનું ભાન ના હોય તેવું પશ્ચિમ કચ્છમાં ઘટી રહેલી સંખ્યાબંધ ઘટનાઓથી પરથી અનુમાન લગાડાય છે.

પશ્ચિમ કચ્છમાં ખુલ્લેઆમ દારૂ જુગારના અડ્ડાઓ ધમધમવા માંડે તો જનતા જ સ્વયંભૂપણે વિરોધમાં ઉતરી આવે તેવી આ જિલ્લાની તાસીર છે. કચ્છને કમાવાનો જિલ્લો માનીને આવેલાં અનેક અધિકારીઓ કદાચ આ જ મુદ્દે ભીંત ભૂલી રહ્યાં છે. હકીકતે પશ્ચિમ કચ્છ જેવા સરહદી જિલ્લામાં નિષ્ઠાવાન અને વરિષ્ઠ પોલીસ અધિકારીઓની નિમણૂક થાય તે જરૂરી છે, નહિ કે એવા અધિકારીઓ કે જે કોઈ રાજકીય પક્ષના બે ટકાના નેતા કે કાર્યકરનો ફોન આવતાં જ ‘સર સર’ કરીને પોતાની બંધારણીય ફરજ ભૂલીને રાજકીય નેતાના ગુલામ બનીને ગેરકાયદે કૃત્યો કરે.