મૃતકોના વારસદારોને દસ દસ લાખના બદલે ૩૦ ૩૦ લાખનું વળતર કેમ ચૂકવવું ના જોઈએ તે મામલે શૉ કૉઝ નોટિસ ફટકારીને આયોગે સરકારના સમાજ કલ્યાણ વિભાગ અને ચીફ સેક્રેટરીનું પૂછાણું લીધું છે.

ગત ૨૩ નવેમ્બર ૨૦૨૨ના રોજ મિરજાપર બસ સ્ટેશન નજીક ગ્રામ પંચાયત હસ્તકની ગટર લાઈનમાં સફાઈ માટે ઉતરેલાં ૨૯ વર્ષિય ભરત શાંતિલાલ અઠવાલ અને તેના ૩૦ વર્ષિય સાળા રવિ રાજુભાઈ મારવાડીના ચેમ્બરમાં રહેલા ઝેરી વાયુથી ગૂંગળાઈને મૃત્યુ થયા હતા.

આ કેસમાં રાજ્ય સરકારે મૃતક સફાઈ કામદારોના વારસદારોને દસ દસ લાખ રૂપિયાનું આર્થિક વળતર આપ્યું હતું.

આ દુર્ઘટના ભારતીય નાગરિકના જીવવાના હક્કના બંધારણીય અધિકાર અને માનવ ગરિમાનો સરેઆમ ભંગ કરતી હોવાનો તથા કડક કાયદા હોવા છતાં તેનું પાલન ના થતાં આ ઘટના ઘટી હોવાનું જણાવીને અમદાવાદના માનવ અધિકાર એક્ટિવીસ્ટ કાન્તિલાલ પરમારે રાષ્ટ્રીય માનવ અધિકાર આયોગમાં રજૂઆત કરી હતી.

એટલું જ નહીં, આયોગે અગાઉ આ રીતે હાથેથી મેલું સાફ કરવાની વ્યવસ્થા પર મૂકેલા પ્રતિબંધ સહિતના ઘડેલા નિયમોનું ગુજરાતમાં કેટલું પાલન થાય છે તે મુદ્દે પણ સરકારનો ખુલાસો માગ્યો છે.