રાયધણઝરમાં મગફળીની વાડીમાં રખોપું કરી રહેલા ખીરસરા (વિંઝાણ)ના ૩૯ વર્ષિય અસલમ હિંગોરાએ આરોપ કર્યો હતો કે ૨૧-૧૦-૨૦૨૫ની રાત્રે વાડીએ રખોપું કરતો હતો ત્યારે મધરાતે દોઢ વાગ્યે કોઠારા પોલીસ સ્ટેશનના રવિરાજસિંહ જાડેજા સહિત કુલ સાત કર્મચારી વાડીએ આવેલાં.

બાદમાં નજીકની વાડીએ રહેલા તેના ભાઈ સલીમને પણ પકડી લાવેલાં. બેઉ ભાઈઓને ગાળો ભાંડીને જીપમાં બેસાડી પોલીસવાળા થોડેક આગળ આવેલા વકાસ જુસબના બકરાંના વાડા પર લઈ ગયેલાં.

ત્યારબાદ રવિરાજે અસલમના ભાગીદાર લાલજી રાઠોડના પુત્ર ભરતને ફોન કરી જણાવેલું કે ‘આજે મૂકી દીધેલ છે સંબંધ ખાતર. બીજી વખત ગમે તેવા કેસમાં ફસાવી દઈશું’ પોલીસવાળા મોબાઈલ પરત આપીને ચાલ્યાં ગયેલાં. સખત મારના લીધે શરીરમાં પીડા થતી હોઈ અસલમને સગાં સંબંધીઓ જી.કે. જનરલ હોસ્પિટલમાં દાખલ કર્યો હતો.

જેથી અસલમે પશ્ચિમ કચ્છને એસપીને ૧૩-૧૧-૨૦૨૫ના રોજ આ મામલે કોઠારા પોલીસને ફરિયાદ નોંધવાનો હુકમ કરવા અરજી કરેલી. ફરિયાદ દાખલ ના થતાં અસલમે નલિયાના અધિક ચીફ જ્યુ. મેજિસ્ટ્રેટની કૉર્ટમાં અરજી દાખલ કરેલી. કૉર્ટે અરજીને મંજૂર કરીને, અરજીમાં દર્શાવેલી હકીકત જોતાં પ્રથમ દ્રષ્ટિએ કોગ્નિઝેબલ ગુનો બન્યો હોવાનું જણાઈ આવતું હોઈ તેના આધારે ગુનો દાખલ કરવા અને ૬૦ દિવસની અંદર કૉર્ટ સમક્ષ તપાસ અહેવાલ રજૂ કરવા હુકમ કર્યો હતો.

રિવિઝન અરજીમાં અરજદાર પોલીસ કર્મચારી વતી રજૂઆત કરાઈ હતી કે એમએલસી જોતા તેના આધારે કોગ્નિઝેબલ ગુનો બનતું હોવાનું ફલિત થતું નથી. સામાન્ય માર મરાયાનો આરોપ હતો. ત્યારબાદ, અસલમે કરેલી અરજી અન્વયે તેને નિવેદન નોંધાવવા માટે પીએસઆઈએ બોલાવેલો પરંતુ તે આવ્યો નહોતો.

ત્યારબાદ રાજ્ય સેવક વિરુધ્ધ કથિત ઘટના તરફ દોરી જતી પરિસ્થિતિ અંગેના નિવેદનોને ધ્યાનમાં લીધા પછી કલમ ૧૭૫ (૧, ર,૩)ની જોગવાઈને આધીન પોલીસ તપાસનો હુકમ કરી શકાય. અરજી સંબંધે કોઈપણ પ્રકારની તપાસ કરાઈ નથી કે ઉપલા અધિકારીઓ પાસેથી કોઈ અહેવાલ મેળવાયો નથી. જેથી નીચલી કૉર્ટનો હુકમ ભૂલભરેલો અને ટકવાપાત્ર નથી તેવી દલીલ કરાઈ હતી.

આ કેસમાં અરજદાર તરફે ભુજના વરિષ્ઠ ધારાશાસ્ત્રી હેમસિંહ સી. ચૌધરી, દીપક ઉકાણી, કુલદીપ જીતેન્દ્રભાઈ મહેતા, હેતલ બી દવે અને પ્રશાંત રાજપૂતે હાજર રહી દલીલો કરી હતી.