આ મામલે ભુજમાંથી SOGએ મેડિકલ ચેક અપ કરાવવા આવેલા ડમી શખ્સને નકલી દસ્તાવેજો સાથે ઝડપી પાડીને મુખ્ય સૂત્રધાર અને મૂળ પાસપોર્ટધારક વિરુધ્ધ ભુજ બી ડિવિઝન પોલીસ મથકે પાસપોર્ટ એક્ટ તથા ભારતીય ન્યાય સંહિતાની વિવિધ કલમો તળે ગુનો દાખલ કરાવ્યો છે.

બાતમીના આધારે SOGએ ભુજના રેલવે સ્ટેશન પાસે આવેલી દેવરાજ હોટેલ પાસેથી સંજયકુમાર નટવરલાલ લુહાર (ઉ.વ. ૪૩, રહે. ડુંગરપુર, રાજસ્થાન)ને ઝડપી પાડ્યો હતો. સંજયની અંગજડતીમાંથી પટેલ દિનેશકુમાર નામ લખેલો પાસપોર્ટ અને આધાર કાર્ડની કલર કોપી મળી આવેલાં. પાસપોર્ટ અને આધાર કાર્ડની કોપીમાં ફોટો સંજયકુમારનો લાગેલો હતો. સંજય પાસેથી તેનું ઓરિજિનલ આધાર કાર્ડ પણ મળી આવેલું.

SOGએ સંજયને કચેરીએ લાવીને સઘન પૂછપરછ કરતાં તેણે જણાવેલું કે તેનો પિતરાઈ ભાઈ સંદિપ શાંતિલાલ લુહાર પાસપોર્ટ વિઝાને લગતી કામગીરી કરે છે. તેની પાસે આવેલ દિનેશકુમાર પટેલ નામનો યુવક મેડિકલી અનફીટ હોઈ, તેના પાસપોર્ટ અને આધારમાં ચેડાં કરીને સંજયનો ફોટો લગાડી તેને ભુજમાં GCC માન્ય હોસ્પિટલમાં મેડિકલ ચેકઅપ કરાવી સર્ટીફિકેટ મેળવવા માટે મોકલ્યો હતો.

SOGએ સંજય લુહાર, સૂત્રધાર સંદિપ લુહાર અને દિનેશ પટેલ વિરુધ્ધ અસલ દસ્તાવેજોમાં ચેડાં કરવા સહિતની કલમો તળે ગુનો દાખલ કર્યો છે. પીઆઈ એ.ડી. પરમારે તપાસ હાથ ધરી છે.