લોકલ ક્રાઈમ બ્રાન્ચે ભુજના મહિલા આશ્રમ પાછળ આવેલા ગીતા કોટેજીસના રહેણાક મકાનમાં દરોડો પાડીને બે સગાં ભાઈ સહિત પાંચ જણની ૧.૫૦ કરોડના અસલી સોનાના ૧૦ બિસ્કીટ્સ, ૧૫ નકલી બિસ્કીટ્સ, ક્રેટા કાર, ત્રણ દ્વિચક્રી વાહનો સાથે અટક કરી છે.

જેના પગલે LCBએ ટેકનિકલ અને હ્યુમન એનાલિસીસ કરતાં જાણવા મળેલું કે ભુજની ગાંધીનગરીમાં રહેતા બશીર હાસમ કાતિયારે આ નકલી આઈડી બનાવી હોવાનું અને અન્ય ચાર સાગરીતો સાથે મળી લોકોની ઠગાઈ કરવાનો પેંતરો રચ્યો છે. પાંચે જણ ગીતા કોટેજીસમાં સુલતાન સુલેમાન કુંભારના રહેણાક મકાને હાજર હોવાની બાતમી મળતાં રાત્રે ૧૦.૩૦ કલાકે LCBની ટીમે દરોડો પાડ્યો હતો.

એક પર્સમાંથી પોલીસને ૧૦૦ ગ્રામ સોનાનું ૧ બિસ્કીટ એવા ૧૦ બિસ્કીટ મળી આવ્યાં હતા. અન્ય પર્સમાંથી નકલી સોનાના ૧૫ બિસ્કીટ મળી આવ્યાં હતા. જે કમરપટ્ટો રાખ્યો હતો તેમાં આ ટોળકીએ ઠગાઈના ઈરાદે બિસ્કીટ જેવા લોખંડના ટુકડાં રાખ્યાં હતા.

LCBએ દોઢ કરોડના અસલી ગોલ્ડ બિસ્કીટ્સ સાથે બહાર પાર્ક થયેલી સુલતાનની ૧૦ લાખની ક્રેટા કાર, અન્ય આરોપીઓના દોઢ લાખના ૩ દ્વિચક્રી વાહનો, ૯૦ હજારની કિંમતના ૯ મોબાઈલ ફોન, સુલતાનની અંગઝડતીમાંથી મળેલાં ૪૩૦૦ રોકડાં રૂપિયા મળી કુલ ૧ કરોડ ૬૨ લાખ ૪૪ હજાર ૩૦૦ રૂપિયાનો મુદ્દામાલ કબજે કર્યો છે. દરોડામાં LCB પીઆઈ એ.એમ. મકવાણા, પીએસઆઈ જે.બી. જાદવ અને એમ.એચ. શિણોલ સહિતનો સ્ટાફ જોડાયો હતો.

પાંચે આરોપી સામે ભુજ બી ડિવિઝન પોલીસ મથકે ભારતીય ન્યાય સંહિતાની કલમ ૩૧૮ (૪), ૩૧૯ (૨) અને ૬૨ હેઠળ સરકાર તરફે ફરિયાદ નોંધાવાઈ છે. જો કે, ઠગાઈના પેંતરા અને પ્રયાસ કે ઠગાઈના ગુનાઓમાં મહત્તમ ૭ વર્ષ સુધીની કેદની સજાની જોગવાઈ હોઈ સુપ્રીમ કૉર્ટે અર્નેશકુમાર વર્સિસ સ્ટેટ ઑફ બિહારના ચુકાદા સાથે આપેલી માર્ગદર્શિકા મુજબ આરોપીઓ ગણતરીના કલાકોમાં મોટાભાગે પોલીસ સ્ટેશનમાંથી જ જામીન મેળવી મુક્ત થઈ જતાં હોય છે. એટલું જ નહીં, ઠોસ પુરાવા ના હોય તો કૉર્ટ મારફતે મુદ્દામાલ પણ છોડાવી દેતાં હોય છે.