ગુનાનો ભોગ બનનારી દીકરી અને તેનો ભાઈ પિતા, દાદી અને મોટા બાપુ પાસે રહેતા હતા. માતાએ પિતા જોડે છૂટાછેડાં લઈ લીધેલાં અને બીજી બે નાની બહેનો સાથે ભુજમાં બીજા પુરુષ જોડે ઘર માંડેલું.

બનાવના દિવસની સાંજે બાળાને માથું દુઃખતું હોઈ, દુઃખાવો મટાડવાના નામે મોટા બાપુએ તેને ચાર ગોળી આપી એકસાથે ગળી લેવા જણાવેલું. દવાની ગોળીઓ ગળ્યાં બાદ બાળાનું માથું ભારે થઈ ગયેલું અને ઘેન ચઢવા માંડેલું.

અર્ધ બેહોશી જેવી હાલતમાં મોટો બાપુ ‘તારી મમ્મીના ઘેર તને મૂકી આવું’ કહીને બાળાને પોતાના છકડામાં બેસાડીને નીકળ્યો હતો. રસ્તામાં નિર્જન બાવળની ઝાડી આવતાં બાળાને ઝાડીમાં લઈ ગયેલો. ત્યાં તેણે બાળાના કપડાં ઉતારવાનું શરૂ કરેલું.

બાળાની રાડારાડ અને પ્રતિકારના પગલે ગભરાઈ જઈને મોટો બાપુ તેને ફરી છકડામાં બેસાડીને તેની મમ્મીના ઘર બહાર ઉતારીને નાસી ગયેલો.બાળાની સલવાર ઉતરી ગયેલી હતી. અર્ધબેહોશ દીકરીને માતા હોસ્પિટલમાં સારવાર માટે લઈ ગયેલી. બીજા દિવસે સંપૂર્ણ સ્વસ્થ થયાં બાદ દીકરીએ મોટા બાપુએ આચરેલાં પાપની વિગતે વાત કરતાં માતાએ ભુજ એ ડિવિઝન પોલીસ મથકમાં ફરિયાદ નોંધાવેલી.

આ ગુનામાં ફરિયાદ પક્ષે રજૂ થયેલાં ૭ સાક્ષી અને ૧૨ દસ્તાવેજી આધારોને તપાસીને આજે પોક્સો કૉર્ટના વિશેષ જજ જે.એ. ઠક્કરે આરોપીને દોષી ઠેરવીને પોક્સો એક્ટની કલમ ૧૮ હેઠળ ૧૦ વર્ષની સખ્ત કેદની સજા સાથે ૧૦ હજારનો દંડ ફટકાર્યો છે.

તો, બીએનએસની કલમ ૭૫ (૧), (૨) હેઠળ ૩ વર્ષની કેદ સાથે ૩ હજાર દંડ તથા કલમ ૧૧૫ (૧) હેઠળ ૬ માસની કેદ અને ૧ હજાર દંડ મળી કુલ ૩૪ હજાર રૂપિયાનો દંડ ફટકાર્યો છે.

ગુનાની તપાસ તત્કાલિન પીઆઈ એ.જી. પરમારે કરી હતી અને સમગ્ર કેસની પેરવી પોક્સો કૉર્ટના વિશેષ સરકારી વકીલ એચ.બી. જાડેજાએ કરી હતી. આરોપીની ધરપકડ થઈ ત્યારથી તે જેલની અંદર જ છે. દુષ્કર્મીનું નામ લખવાથી પરોક્ષ રીતે બાળકીની ઓળખ છતી થવાનો ભય હોઈ અત્રે નામ લખ્યું નથી.

કૉર્ટે ડિસ્ટ્રીક્ટ લીગલ સર્વિસ ઑથોરીટીને ગુનાનો ભોગ બનનાર બાળાને ૫.૨૫ લાખ રૂપિયા વળતર તરીકે ચૂકવવા તથા ચાઈલ્ડ વેલફેર કમિટી અને ડિસ્ટ્રીક્ટ ચિલ્ડ્રન પ્રોટેક્શન યુનિટને દીકરીના સમાજમાં સ્વસ્થ પુનર્વસન માટે મદદ કરવા સૂચના આપી છે.

ચુકાદમાં વિશેષ જજે નોંધ્યું કે બાળકો અતિ સંવેદનશીલ હોય છે અને જ્યારે બાળક પોતાની જાતને વાલીના વાલીપણામાં સુરક્ષિત સમજતું હોય ત્યારે જો આવો બને છે તો તેનાથી બાળકની માનસિક સ્થિતિ પર ઘણી બધી અસર પડે છે, જેની તેના સમગ્ર જીવન દરમિયાન લાંબા ગાળાની નેગેટિવ અસર રહે છે. આરોપી દીકરીની નજરમાં પિતા તુલ્ય હતો અને તેણે આવું કૃત્ય આચર્યું છે તે અતિ નિંદનીય છે અને આપણા સમાજમાં આવા કૃત્યને કોઈપણ રીતે સ્થાન હોઈ શકે નહીં તે હકીકત છે.