પીએમ મોદીએ જણાવ્યું કે જે પણ ભારતીયોનું ખૂન વહેવડાવવાની કોશીશ કરશે તેને તેની જ ભાષામાં જવાબ અપાશે. ઓપરેશન સિંદુરને માનવતાની રક્ષા અને આતંકવાદના અંતનું મિશન ગણાવતાં મોદીએ કહ્યું કે પહલગામના હુમલાની ૨૨ મે પછી મેં બિહારની જનસભામાં છાતી ફૂલાવીને જાહેરાત કરેલી કે હું આતંકવાદના ઠેકાણાઓને માટીમાં ભેળવી દઈશ.

ભારતના કારગીલ ઉપર આતંકવાદીઓના હેડ ક્વાર્ટર હતા. સેંકડો કિલોમીટર દૂર જઈને, આસપાસમાં કોઈને નુકસાન કર્યા વગર સીધો પ્રહાર કર્યો, સચોટ વાર કર્યા. આ દર્શાવે છે કે આપણું સૈન્ય કેટલું સક્ષમ અને કેટલું અનુશાસિત છે. આપણે દનિયાને દેખાડ્યું કે અમે આતંકવાદના અડ્ડાઓને અહીં જ બેઠાં બેઠાં માટીમાં ભેળવી દઈ શકીએ છીએ.

આપણે આતંકવાદીઓના ઠેકાણાઓ પર હુમલા કરેલા પરંતુ પાકિસ્તાને આપણા નિર્દોષ નાગરિકો પર હુમલા કરવાની કોશીશ કરેલી. તેમના ડ્રોન આંખના પલકારાની જેમ એક પછી એક તૂટવા માંડયા. ભારતે પણ તેમની સેના પર બેગણી તાકાતથી હુમલો કર્યો. ભારતે જે સચોટતાથી પાકિસ્તાનના એર બેઝોને, તેમના સૈન્ય થાણાંઓને તબાહ કરી દીધા તેનાથી આખી દુનિયા અચંબિત થઈ ગયેલી.

ભારતે તેનું રૌદ્ર રૂપ દેખાડી દીધું છે. અંતે તો આ આપણી સેનાનું પરાક્રમ અને સાહસ હતું. કેટલાંક જ કલાકોમાં પાકિસ્તાને સફેદ ઝંડા લહેરાવવાનું શરુ કરી દીધું. તેમણે કહ્યું કે અમે ગોળી છોડવા નથી ઈચ્છતાં. આપણે તો અગાઉથી જ કહેલું કે અમારે આતંકવાદીઓના ઠેકાણાં તોડવાના હતા. તેમને સબક શીખવવાનો હતો. ત્યારબાદ પાકે. ચૂપ રહેવાની જરુર હતી પરંતુ પાકે. ભૂલ કરી તો તેની સજા પણ ભોગવવી પડી.

ભારતની લડાઈ સીમા પાર પોષાઈ રહેલા આતંકવાદ સામે છે, જે લોકો તેને પોષે છે તેમની સાથે દુશ્મની છે. હું કચ્છની ધરતી પરથી આજે પાકિસ્તાનના લોકોને પણ કહેવા ઈચ્છું છું કે શું મેળવ્યું તમે? હિન્દુસ્તાન વિશ્વનું ચોથું અર્થતંત્ર બની ગયું અને તમારા હાલ કેવા છે? તમારા બાળકોના ભવિષ્યને કોણે બરબાદ કર્યાં? તેમને દર-દર ભટકવા માટે કોણે મજબૂર કર્યાં? આતંકવાદના આકાઓએ. ત્યાંની સેનાનો એક જ એજન્ડા છે. 

પાક.ના યુવકો, બાળકોએ નક્કી કરવું પડશે કે શું આ રસ્તો યોગ્ય છે? શું તેમનું ભલુ થઈ રહ્યું છે? સત્તા માટે આ જે ખેલ ખેલી રહ્યાં છે શું તેનાથી તેમની જીંદગી બનશે? હું પાક.ના બાળકોને કહેવા માંગુ છું કે કે તમારી સરકાર અને સેના આતંકવાદના ઓછાયામાં ઉછરી રહી છે. તે તમારા જીવનમાં જોખમ સર્જી રહી છે, તમારા ભવિષ્યને નષ્ટ કરી રહી છે. તમને અંધારામાં ધકેલી રહી છે.