૬૫ વર્ષિય ગુલામ મુર્તુજા હસન મોહમ્મદ શાહ સૈયદ, ૬૧ વર્ષિય બશીર જાબાદ બલોચ અને ૫૪ વર્ષિય અકબર અલી અબ્દુલ ગની લાડક (રહે. ત્રણે કરાચી)ની બીએસએફએ ૨૨-૦૨-૨૦૨૩ના રોજ સીર ક્રીકમાંથી ફિશીંગ બોટ સાથે ધરપકડ કરી હતી. તેમના કબજામાંથી પાક. મોબાઈલ, સીમકાર્ડ, જીપીએસ અને વાયરલેસ સિસ્ટમ મળી આવી હતી.

૦૨-૦૫-૨૦૨૩ના રોજ બીએસએફએ ત્રણે વિરુધ્ધ નારાયણ સરોવર પોલીસ મથકે ફોરેનર્સ એક્ટ અને પાસપોર્ટ એક્ટ તળે ફરિયાદ નોંધાવી હતી. જે ગુનામાં પોલીસે તેમની ૦૫-૦૬-૨૦૨૩ના રોજ વિધિવત્ ધરપકડ કરી હતી. આ ગુનામાં આજે ભુજના નવમા અધિક સેશન્સ જજ ડી.બી. રાજને ત્રણેને દોષિત ઠેરવીને પાસપોર્ટ એક્ટની કલમ ૩ હેઠળ બે વર્ષની સખ્ત કેદ સાથે ૫ હજાર દંડ તથા ફોરેનર્સ એક્ટની કલમ ૧૪ (એ) (બી) હેઠળ બે વર્ષની સખ્ત કેદ સાથે ૧૦ હજાર રૂપિયા દંડ ફટકાર્યો છે.

જો કે, કેદની સજા પૂર્ણ થયાં બાદ પણ જ્યાં સુધી તેમને પાકિસ્તાન ડીપોર્ટ કરવાની મંજૂરી ના મળે ત્યાં સુધી તેમણે જોઈન્ટ ઈન્ટરોગેશન સેન્ટરમાં પોલીસ પહેરા હેઠળ નજરકેદમાં જ રહેવું પડશે.